Norræni bankinn Nordea gæti fengið allt að 6,5 milljarða danskra króna sekt vegna ítrekaðra brota á peningaþvættislöggjöf Danmerkur, samkvæmt Børsen sem hefur ákæru gegn bankanum undir höndum.
Líkt og greint var frá í síðustu viku ákváðu saksóknarar í Danmörku fyrir stórfelld brot gegn á árunum 2012 til 2015 en málið snýr að gjaldeyrisviðskiptum fyrir um 26 milljarða danskra króna eða 520 milljarða íslenskra króna á gengi dagsins.
Nordea reyndi að gera sátt í málinu og bauðst til að greiða 700 milljónir danskra króna, eða um 14 milljarða króna, í sekt en yfirvöld í Danmörku höfnuðu því og fór því málið fyrir dóm.
Flest viðskiptin tengjast útibúi Nordea í Nørrebro við gjaldeyrismiðlafyrirtæki tengd rússneskum stórviðskiptavinum bankans.
Brot Nordea fengu ítarlega umfjöllun hjá TV 2 árið 2018 en þar var farið yfir hvernig gjaldeyrismiðlafyrirtækið New Travel & Exchange pantaði 500 evru seðla frá útibúi Nordea í Nørrebro fyrir 210 milljónir danskra króna.
Þrátt fyrir að yfirvöld höfðu varað alla banka landsins við því að 500 evru seðillinn væri vinsæll meðal glæpamanna voru um 97% af öllum gjaldeyrisviðskiptum New Travel & Exchange við Nordea með 500 evru seðla.
Í frétt Børsen segir að þrátt fyrir að enginn kaupi matvörur með 500 evru seðli hafi þetta verið einhver vinsælasti seðillinn í útibúi Nordea í Nørrebro árum saman.
Fjármálaeftirlit Danmerkur hóf rannsókn á brotum Nordea árið 2015 og nú átta árum seinna fer málið fyrir dómstóla þar sem samningaviðræður Nordea og yfirvalda hafa ekki borið árangur.
Nordea sendi frá sér tilkynningu á föstudaginn þar sem bankinn hafnar því alfarið að hafa farið á svig við lög.
Bankinn sagðist ósammála túlkun danskra yfirvalda á peningaþvættislöggjöfinni.
