Viðskiptavettvangurinn Nordnet skilaði 1,8 milljörðum danskra króna í hagnað í fyrra sem samsvarar um 35 milljörðum íslenskra króna á gengi dagsins.
Samkvæmt Børsen er viðskiptavettvangurinn gríðarlega vinsæll meðal einkafjárfesta og stefnir félagið á að hefja starfsemi í Þýskalandi á árinu en það yrði fyrsta skref félagsins út fyrir Norðurlöndin.
Samkvæmt nýbirtu uppgjöri félagsins er áhugi á fjárfestingum að aukast á Norðurlöndunum og sýndi félagið fram á áframhaldandi vöxt á mörkuðum sínum í Danmörku, Svíþjóð, Noregi og Finnlandi.
Í Danmörku fjölgaði viðskiptavinum um 100 þúsund á síðasta ári, sem er 20 prósenta aukning, og eru danskir viðskiptavinir Nordnet nú orðnir 528 þúsund.
Samkvæmt ársreikningi Nordnet hafa danskir viðskiptavinir fjárfest samtals 170 milljarða danskra króna í gegnum vettvanginn, eða að meðaltali 322 þúsund danskar krónur á hvern viðskiptavin.
Novo Nordisk er vinsælasta hlutabréfið meðal danskra viðskiptavina Nordnet, en vinsældir félagsins drógust þó saman á seinni hluta ársins 2024.
Þrátt fyrir það hefur áhugi danskra fjárfesta einnig beinst að bandarískum tæknirisum á borð við Tesla, Apple, Microsoft, Amazon og Nvidia.
„Árið 2025 sýna fjárfestar áfram áhuga á bandarískum hlutabréfum og vonast jafnframt til að evrópskur markaður, þar á meðal danskur, taki við sér,“ segir Per Hansen aðalhagfræðingur Nordnet.
Ársreikningurinn leiðir í ljós að Nordnet hefur tvær megintekjulindir: þóknanir vegna viðskipta og vextir af fjármagni sem viðskiptavinir leggja inn eða lána til skulda og fjárfestinga.
Tekjur af þóknunum námu um 1,6 milljörðum danskra króna, en vextir skiluðu 1,7 milljörðum danskra króna.
Stækkun Nordnet til Þýskalands markar tímamót fyrir fyrirtækið, þar sem þetta er fyrsta skrefið utan Norðurlanda.
Með þessu hyggst Nordnet sækja enn frekar fram á alþjóðamarkaði og styrkja stöðu sína sem leiðandi vettvangur fyrir einkafjárfesta.
