Hlutabréfaverð Icelandair leiddi hækkanir á aðalmarkaði í dag er gengi flugfélagsins fór upp um 6% í 270 milljón króna viðskiptum.
Icelandair birti farþegatölur fyrir opnun markaða í morgun en Icelandair hefur flutt yfir 4 milljónir farþega á árinu sem er um 8% fleiri en á sama tíma í fyrra.
Flugfélagið flutti flutti 409 þúsund farþega í októbermánuði sem er um 12% fleiri farþegar en á sama tíma í fyrra en í kauphallartilkynningu félagsins sagði að eftirspurn eftir ferðum til Íslands hefði aukist á nýjan leik.
Dagslokagengi Icelandair var 1,15 krónur.
Gengi Eimskips tók einnig kipp í viðskiptum dagsins en gámaflutningafélagið birti uppgjör eftir lokun markaða í gær. Samkvæmt nýbirtu uppgjöri félagsins má rekja afkomuna til góðs tekjuvaxtar.
Tekjur Eimskips jukust um 18,6 milljónir evra frá fyrra ári og námu 220,6 milljónum evra á fjórðungnum, sem samsvarar um 33 milljörðum króna á gengi dagsins.
Hagnaður eftir skatta nam 14,3 milljónum evra samanborið við 16,6 milljónir evra fyrir sama tímabil árið 2023. Sé miðað við gengi dagsins hagnaðist Eimskip um 2,1 milljarð króna á fjórðungnum.
Hlutabréf í Eimskip hækkuðu um 5% í 374 milljón króna veltu og var dagslokagengi félagsins 393 krónur. Gengi Eimskips hefur nú hækkað um 25% frá miðjum október.
Langmesta veltan í dag var með bréf Marels en gengi félagsins hækkaði um tæp 2% í 1,8 milljarða króna veltu.
Dagslokagengi Marels var 594 krónur sem er hærra en tilboðsverð JBT í alla hluti félagsins, miðað við fast skiptigengi evru og krónu í viðskiptunum, ákveði hluthafi að þiggja einungis reiðufé fyrir sína hluti.
Líkt og Viðskiptablaðið hefur fjallað um eru erlendir fjárfestingasjóðir að skortselja bréf í JBT og kaupa í Marel á móti til að festa inn hagnað á gengismun í viðskiptunum.
Hlutabréfaverð Eikar leiddi lækkanir á aðalmarkaði er gengi félagsins fór niður um rúm 2% í 83 milljón króna viðskiptum.
Úrvalsvísitalan hækkaði um 0,85% og var heildarvelta á markaði 8,2 milljarðar.
