Ölgerðin Egill Skallagrímsson hf. hefur skrifað undir samning um kaup á öllu hlutafé í Ankra ehf., fyrirtæki sem hefur framleitt kollagen fyrir Ölgerðina frá árinu 2019. Heildarvirði viðskiptanna nemur 600 milljónum króna.
Kollagen frá Ankra hefur verið notað við framleiðslu á drykknum Collab.
Áhrif kaupanna á EBITDA Ölgerðarinnar á næsta fjárhagsári eru áætluð um 100 milljónir króna, samkvæmt kauphallartilkynningu félagsins.
Stærsti eigandi Ankra, Hrönn Margrét Magnúsdóttir, sem jafnframt er framkvæmdastjóri og einn af stofnendum fyrirtækisins, mun áfram vera til ráðgjafar fyrir Ölgerðina og aðstoða við útflutning á Collab næstu tvö árin.
Samkvæmt samkomulagi mun Hrönn einnig halda áfram rekstri vörumerkisins Feel Iceland sem hún keypti út úr Ankra, en Ölgerðin mun hafa ótímabundinn rétt til notkunar á því við framleiðslu og markaðssetningu á Collab.
„Það er afar ánægjulegt að samningar um kaup Ölgerðarinnar á Ankra hafi náðst og við hlökkum til áframhaldandi samstarfs við Hrönn í þeirri vegferð að gera Collab enn stærra. Rúm sex ár eru síðan Hrönn bankaði upp á hjá okkur með þá hugmynd að gera drykk sem innihéldi kollagen sem unnið væri úr íslensku fiskroði. Síðan hefur mikið vatn runnið til sjávar og Collab selt meira en 40 milljónir dósa, unnið til alþjóðlegra verðlauna og vakið mikla athygli. Collab hefur verið fáanlegt í Danmörku um hríð og markaðssókn er að hefjast í Þýskalandi í vor,“ segir Andri Þór Guðmundsson, forstjóri Ölgerðarinnar.
„Frá stofnun til dagsins í dag hefur Ankra notað yfir 2.500 tonn af fiskroði, sem áður var hent og þannig aukið verðmæti hliðarafurða íslenska fisksins töluvert við sköpun fyrsta flokks kollagenvara. Við erum mjög stolt af því og þeim árangri sem Collab hefur náð á svo skömmum tíma í þessu árangursríka samstarfi. Það verður ánægjulegt að fylgjast með áframhaldandi uppbyggingu Ölgerðarinnar á Collab erlendis og taka þátt í þeirri vegferð. Á sama tíma er ég spennt fyrir því að leggja áherslu mína á Feel Iceland og halda áfram að þróa sjálfbærar kollagen fæðubótavörur af bestu gæðum úr íslensku fiskroði og sjávarafurðum,“ segir Hrönn Margrét Magnúsdóttir, framkvæmdastjóri Ankra.
