Hlutabréfaverð Ölgerðarinnar hefur lækkað um tæp 4% í viðskiptum dagsins og stendur gengi félagsins í 18,3 krónum þegar þetta er skrifað.
Ölgerðin birti árshlutauppgjör þriðja ársfjórðungs eftir lokun markaða í gær þar sem kom fram að hagnaður dróst saman um tæplega 22% frá sama tímabili í fyrra.
Ölgerðin hagnaðist um 568 milljónir króna á fjórðungnum sem lauk 30. nóvember síðastliðinn sem er lækkun úr 728 milljónum árið á undan.
Vörusala Ölgerðarinnar jókst um 0,9% milli ára og nam 11,3 milljörðum króna á fjórðungnum. Félagið segir að betri sala til hótela og veitingastaða, fyrirtækja og ÁTVR hafi stutt við aukna vörusölu á fjórðungnum.
Rekstrarhagnaður félagsins fyrir afskriftir (EBITDA) dróst saman um 13,6% milli ára og nam 3,9 milljörðum. Afkomuspá fyrir fjárhagsárið 2024 er óbreytt og gerir ráð fyrir EBITDA á bilinu 4,9 – 5,3 milljarðar króna.
„Ölgerðin heldur áfram að renna styrkum stoðum undir rekstur sinn, þó vissulega finnum við fyrir krefjandi ytri aðstæðum, eins og flest fyrirtæki,“ segir Andri Þór Guðmundsson, forstjóri Ölgerðarinnar.
