Óvissa á alþjóðamörkuðum og mismunandi þróun verðbólgu hefur leitt til ólíkra vaxtaákvarðana í Evrópu í vikunni. Englandsbanki kaus að halda vöxtum óbreyttum í morgun en bæði Seðlabanki Noregs og Sviss ákváðu að lækka vexti, þó af ólíkum ástæðum.
Englandsbanki tilkynnti í dag að meginvextir yrðu áfram 4,25%, í kjölfar vaxtalækkunar um 0,25 prósentur í maí.
Þrátt fyrir batamerki í efnahag landsins mældist verðbólga 3,4% á ársgrundvelli í maí sem er vel yfir 2% markmiði seðlabankans.
„Við sjáum merki um kólnun á vinnumarkaði og fylgjumst náið með hvort það skili sér í minni verðbólgu,“ sagði Andrew Bailey seðlabankastjóri. Hann viðurkenndi þó að heimurinn væri „mjög óútreiknanlegur“, meðal annars vegna ástandsins í Mið-Austurlöndum.
Þrír nefndarmenn vildu ganga lengra og lækka vexti strax í dag niður í 4%, þar á meðal varaseðlabankastjórinn Dave Ramsden.
Óvænt lækkun í Noregi
Seðlabanki Noregs greip til óvæntrar vaxtalækkunar í morgun og dró meginvexti úr 4,5% í 4,25%.
Þetta kom mörgum markaðsaðilum á óvart þar sem 23 af 26 hagfræðingum í könnun Reuters höfðu gert ráð fyrir óbreyttum vöxtum.
„Verðbólga hefur dregist saman hraðar en búist var við og horfur eru nú betri,“ sagði seðlabankastjórinn Ida Wolden Bache. Hún bætti við að ef spár rættust mætti búast við frekari lækkunum á árinu – hugsanlega niður í 3,75% fyrir árslok.
Kjarnaverðbólga í Noregi mældist 2,8% í maí, sem er undir væntingum og nær markmiði bankans (2%).
Seðlabanki Sviss ákvað að lækka stýrivexti í 0%, í fyrsta skipti síðan hann yfirgaf neikvæð vaxtastig árið 2022.
Þessi ákvörðun kemur í kjölfar þess að verðbólga í landinu hefur verið mjög lág en hún mældist -0,1% í maí. Þá hefur gengi svissneska franksins hefur styrkst um 10% gagnvart dollar á þessu ári.
Frankinn hefur aukið innflutningskraft landsins og þrýst verðlagi niður, en það hefur jafnframt gert stjórnvöldum erfitt fyrir að stýra hagkerfinu án þess að sæta ásökunum um handstýra gengi gjaldmiðilsins.
Seðlabankinn sagði í yfirlýsingu að hann ætti ekki von á hertari verðbólgu í Evrópu en benti á að þrýstingur gæti aukist í Bandaríkjunum.
Ákvörðunin gæti skapað áskoranir fyrir svissneska banka, sem nú fá ekki lengur vexti á inneignir sínar hjá seðlabankanum.
