Samtök verslunar og þjónustu (SVÞ) vara fjárlaganefnd við því að taka jákvætt í beiðni Bíós Paradísar um 50 milljóna króna ríkisstyrk. Samtökin segja ljóst að rekstur kvikmyndahússins sé ósjálfbær og að opinber fjárframlög til þess skekki samkeppnisstöðu á markaðnum.
„Auðsætt er að opinber fjárframlög til reksturs eins kvikmyndahúss leiðir af sér alvarlega mismunun og skekkir samkeppnisstöðu kvikmyndahúsa,“ segir í athugasemd SVÞ vegna erindis Heimili kvikmyndanna ses.
„Margt gott má segja um kvikmyndahúsið BÍó ParadÍs. Það virðist þó ljóst að rekstur þess er ósjálfbær.“
Líkt og Viðskiptablaðið fjallaði um á dögunum þá óskaði Heimili kvikmyndanna ses., sjálfseignarstofnunin sem heldur utan um rekstur Bíós Paradísar, eftir því við fjárlaganefnd að hún styrki starfsemi bíóhússins um 50 milljónir króna á árinu 2025.
Þetta er annað árið í röð sem Bíó Paradís leitar til fjárlaganefndar og óskar eftir 50 milljóna ríkisstyrk til viðbótar við önnur fjárframlög frá hinu opinbera. Fjárlaganefnd féllst í fyrra á að veita Bíó Paradís 18 milljónir króna í tímabundinn styrk í fjárlögum 2024.
Bíó Paradís því fær alls 78 milljónir króna í formi rekstrarstyrkja frá bæði ríki og borg í ár. Kvikmyndahúsið fær 56 milljónir árlega í gegnum samstarfssamninga við Reykjavíkurborg og ríkisstofnunarinnar Kvikmyndamiðstöð Íslands.
Komi óhjákvæmilega niður á öðrum bíóhúsum
SVÞ segja að ekki verði séð að gengið hafi verið úr skugga um að umfang styrkjanna nemi fjárhæð sem rúmast innan marka reglna EES-samningsins á sviði ríkisstyrkja.
Samtökin segja ríkan stuðning hins opinbera við rekstur Bíós Paradísar óhjákvæmilega koma niður á tekjumöguleikum annarra kvikmyndahúsa „sem hafa, eins og Bíó Paradís, félagslegu og menningarlegu hlutverki að gegna, gera íslenskri kvikmyndagerð hátt undir höfði og skapa fjölda starfa“.
Þau hvetja Alþingi til þess að hafa jafnræði í heiðri ef veita á fjárframlög til kvikmyndasýninga. Það sé skoðunar virði að bjóða út þá félags- og menningarlegu þjónustu kvikmyndahúsa sem æskilegt er talið að hér verði starfrækt.
Rekstur kvikmyndahúsa í járnum
SVÞ segja að rekstur margra kvikmyndahúsa sé í járnum sem megi m.a. til áhrifa tekjufalls í Covid og aukinnar samkeppni frá streymisveitum. Þá hafi aðsókn í kvikmyndahús dregist verulega saman og sé aðeins um helmingur þess sem hún var fyrir heimsfaraldurinn.
Kvikmyndasýningar í Háskólabíói heyri sögunni til og önnur bíóhús hafa fækkað sýningarsölum. Um síðustu mánaðamót var tveimur kvikmyndasölum við Álfabakka í Reykjavík lokað og um næstu mánaðamót verður Nýjabíóinu í Keflavík skellt í lás.
„Rekstraraðilar kvikmyndahúsa standa því frammi fyrir alvarlegri stöðu og mega ekki við frekari skakkaföllum.“
Samtökin segja stuðningsaðgerðir stjórnvalda vegna samkomutakmarkanna í Covid hafi verið rýrar þar sem þeim var ekki fyrirskipað að loka heldur gátu lagað sig að breyttum aðstæðum. Rekstraraðilar kvikmyndahúsa hafi því setið uppi með fastan kostnað auk rekstrarkostnaðar á sama tíma og tekjufall blasti við.
„Vegna sambærilegra afleiðinga veittu ríkissjóður og Reykjavíkurborg tónlistar- og ráðstefnuhúsinu Hörpu 400 milljónir króna fjárstuðning vegna tekjutaps og Þjóðleikhúsinu 350 milljóna króna viðbótarframlag. Reykjavíkurborg lagði 78 milljónir króna til Borgarleikhússins sem bjó við sambærilegar aðstæður og kvikmyndahúsin.“
Vilja í neðra vsk-þrepið
SVÞ leggja til að leiðrétt verði það ósamræmi sem felist í því að kvikmyndahúsum ber að leggja 24% virðisaukaskatt á miðaverð á meðan 11% virðisaukaskattur er lagður á áskriftir sjónvarpsstöðva og streymisveitna.
„Sú staða leiðir augljóslega til misræmis, mishár skattur er lagður á einu og sömu kvikmyndina, allt eftir því hvar hún er sýnd. Leiðréttingin mun nýtast greininni allri og skapa fyrirtækjum hennar að tækifæri til að keppa á jafnréttisgrundvelli við erlendar streymisveitur.“
