Útgerðarfélagið Skinney-Þinganes á Höfn í Hornafirði, sem rekur blandaða uppsjávar- og botnfiskveiði, hefur sett áform um frekari uppbyggingu í bolfiski og áframhaldandi fjárfestingar í landi á ís, að því er kemur fram í umsögn félagsins um frumvarp atvinnuvegaráðherra um hækkun veiðigjalda.
Félagið bendir á að það hafi á undanförnum árum staðið undir fjárfestingum á Höfn fyrir yfir 4 milljarða króna og áætlar að ljúka fjárfestingum á árinu fyrir yfir 3 milljarða króna til viðbótar. Til stendur að ljúka byggingu nýs uppsjávarskips sem mun kosta yfir 5,5 milljarða.
Hætt við að framleiðslan flytjist úr landi
Í umsögninni er varpað fram niðurstöðu greiningar Deloitte á hvaða áhrif fyrirhuguð hækkun veiðigjalda hefði haft á afkomu Skinneyjar-Þinganess á árinu 2024.
Hlutfall veiðigjalds af hagnaði ársins 2024 fyrir tekjuskatt, veiðigjöld og kolefnisgjald hefði hækkað úr 30,3% í 71,0%. Samanlagt hlutfall veiðigjalda, kolefnisgjalda og tekjuskatts hækkar úr 59,7% í 91,8%. Afleiðingin er sú að arðsemi eiginfjár lækkar úr 3,4% niður í 0,7%.
„Ljóst má vera að rekstrarumhverfi þar sem ríkið tekur til sín um 92% af hagnaði fyrir þessa liði er ekki sjálfbært og mun því knýja á um breytingar í rekstrinum til að mæta þessum gríðarlegu hækkunum á opinberum gjöldum […]
Ef ríkisvaldið tekur til sín um 92% af hagnaði félagsins og skattleggur rekstur með þessum hætti, þá verður ekki einungis dregið úr arðsemi og uppbyggingu, heldur er hætt við að framleiðslan flytjist úr landi. Það væru þá ekki aðeins félagsleg mistök heldur einnig alvarlega efnahagsleg mistök.“
Ekki leiðrétting heldur hrein skattahækkun
Félagið segir að aðferðirnar sem beita á til að ná fram hækkun veiðigjalda séu umdeilanlegar. Ráðamenn kalli þær „leiðréttingar“, þrátt fyrir að í raun og veru sé hér um hreina skattahækkun að ræða.
