Staða íslenska fasteignamarkaðarins er að mati Kára S Friðrikssonar, hagfræðings í greiningardeild Arion banka, mjög áhugaverð enda hafi þróun hans verið önnur en gera mátti ráð fyrirfram sökum ytri aðstæðna. „Fjöldi kaupsamninga það sem af er ári er talsverður og því nokkuð mikið líf í markaðnum.“
Ef tekin séu út fyrir sviga tímabil sem hafa verið óvenjuleg – á borð við heimsfaraldurstímabilið þar sem vextir lækkuðu mjög mikið, góðærisárin og áhrifin vegna jarðhræringa í Grindavík – hafi salan á höfuðborgarsvæðinu verið með því mesta sem gerist. „Hjá nágrannasveitarfélögunum hefur salan farið minnkandi, sem var viðbúið þar sem Grindavíkuráhrifin voru mjög mikil þar.“
Það sem geri stöðuna svo áhugaverða sé að á sama tíma og salan hafi verið mikil á höfuðborgarsvæðin sé framboð íbúða til sölu að stóraukast.
© Eyþór Árnason (Eyþór Árnason)
„Þó að salan sé mikil er hún ekki nógu mikil til að grynnka á framboðið. Nýjar íbúðir hafa verið að koma hratt inn á markaðinn í töluverðu magni á þessu ári og þær virðast seljast hægt. Það er athyglisvert að þrátt fyrir að nægt framboð sé af íbúðum á höfuðborgarsvæðinu hefur íbúðaverð haldið áfram að hækka. Það er ekki síður áhugavert í ljósi þess að á síðustu mánuðum, þó að það sé að snúast við núna, hafa verðtryggðir vextir verið að hækka og raunvextir verið háir um nokkuð langt skeið. Við slíkar aðstæður hefði maður haldið að íbúðaverð myndi gefa aðeins eftir.“
Svo virðist því vera sem að fólk sé að spenna bogann hærra til við kaup á íbúðarhúsnæði. „Tölur Seðlabankans sýna að hlutfall þeirra sem greiða yfir 30% af ráðstöfunartekjum í afborgun af húsnæðisláni fer fjölgandi.“
Nánar er fjallað um málið í Viðskiptablaðinu sem kom út í morgun. Áskrifendur geta lesið fréttina í heild hér.
