Síminn hf. hagnaðist um 179 milljón krónur á öðrum ársfjórðungi samkvæmt árshlutauppgjöri. Mun það vera lækkun úr 410 milljón króna hagnaði á sama tímabili í fyrra.
Tekjur á öðrum ársfjórðungi námu 6,283 milljörðum króna samanborið við 6,036 milljarða á sama tímabili 2022. Mun það vera um 4,1% aukning milli ára.
„Enn er tekjuvöxtur í kjarnaþjónustu Símans, en tekjur af farsíma, gagnaflutningi og sjónvarpsþjónustu aukast um tæp 9% á fjórðungnum. Vörusala búnaðar dregst saman um 17,5%“ segir í uppgjörinu.
Um 18 milljarðar í eigið fé
Rekstrarhagnaður fyrir afskriftir og fjármagnsliði (EBITDA) nam 1,410 milljörðum króna og eykst því um 11 m.kr. eða 0,8%.
EBITDA hlutfallið er 22,4% en var 23,2% á sama tímabili 2022.
Rekstrarhagnaður (EBIT) nam 362 milljónum á öðrum ársfjórðungi samanborið við 682 milljónir á sama tímabili 2022.
Eiginfjárhlutfall Símans var 55,1% í lok fjórðungsins og eigið fé 18,2 milljarðar króna.
Útlán gegnum veltukort okkar njóta einnig heilbrigðs vaxtar og því eru fjármagnstekjur Símans að aukast
„Árið 2023 er fyrsta árið sem Síminn starfar sem hreinræktað þjónustufyrirtæki, eftir að hafa selt Mílu á síðasta ári. Í kjölfar slíkra grundvallarbreytinga er ánægjulegt að sjá tekjur kjarnavara okkar vaxa myndarlega milli ára, þ. e. í Interneti, sjónvarpi og farsíma. Auglýsingatekjur sjónvarps eru dæmi um þá aukningu og á sú þjónusta enn talsvert inni vegna nýrra möguleika sem byrjað er að bjóða auglýsendum upp á. Útlán gegnum veltukort okkar njóta einnig heilbrigðs vaxtar og því eru fjármagnstekjur Símans að aukast. Í hávaxtaumhverfi dagsins eru fjármagnsgjöld einnig að aukast, en hófleg skuldsetning félagsins kemur til góða við núverandi aðstæður. Tekjur af talsíma halda áfram sínum fyrirsjáanlega samdrætti og sala búnaðar var auk þess lægri en á sama tíma í fyrra,” segir Orri Hauksson forstjóri Símans í uppgjöri.
Orri segir jafnframt að í heild hafi EBITDA lítillega hækkað á fjórðungnum, þar sem kostnaður óx næstum jafn hratt og tekjur. Laun hækkuðu hratt í takt við launaþróun í landinu og birgjasamningar eru margir með beina og óbeina tengingu við almenna verðþróun.
„Vegna átaks í fjárfestingum undanfarið í sjónvarpsefni og tækni, sem hefur stuttan afskriftatíma en mun með ýmsum hætti styrkja reksturinn til lengri tíma litið, eru hraðar afskriftir á þessu ári. Langtímauppbygging 5G kerfa heldur áfram í samstarfi við Mílu og gamla talsímakerfið verður lagt af um áramót, sem mun spara kostnað á móti lækkandi tekjum í talsíma,“ segir Orri.
Verkföll í USA og SKE hafa áhrif
Orri bendir á að eins og áður hefur verið kynnt hefur staðið til að draga úr fjárfestingum í sjónvarpsefni næstu misserin.
„Umfangið gæti dregist enn hraðar saman á síðustu mánuðum ársins en gert var ráð fyrir, þar sem stefnir í skort á sjónvarpsefni frá Bandaríkjunum vegna verkfalla leikara og handritshöfunda. Á móti kemur að íslenskt efni verður sterkt í vetur, svo sem leiknar íslenskar þáttaraðir og þættir um hljómsveitina IceGuys. Áhugaverðir íþróttaréttir munu verða boðnir út með haustinu, en fram er komin ný óvissa um virði slíkra rétta ef nýlunda Samkeppniseftirlitsins varðandi lagalega meðhöndlun þeirra fær að standa. Undir öllum kringumstæðum er Síminn með áætlanir um að bregðast hratt við til að bjóða kröfuhörðum sjónvarpsáhorfendum á Íslandi upp á gæðaefni,“ segir Orri.
