Samkeppnin um markað þyngdarstjórnunarlyfja í töfluformi hefur harðnað til muna og hafa nýjustu framfarir hjá helsta keppinaut Novo Nordisk, bandaríska lyfjafyrirtækinu Eli Lilly, hafa leitt til markaðssvars sem hefur rýrt verðmæti Novo umtalsvert.
Hlutabréf Novo Nordisk lækkuðu um 7,5% í gær, í kjölfar þess að Eli Lilly kynnti jákvæðar niðurstöður úr fasa 3 lyfjarannsókn á nýju þyngdarstjórnunarlyfi í töfluformi, orforglípróni.
Meðferðin sýndi fram á 7,9% meðalþyngdartap eftir 40 vikna meðferð við hæstu skömmtun, auk marktækrar lækkunar á blóðsykri hjá sykursjúkum.
Hlutabréf Novo hafa nú lækkað um meira en 60% frá hæsta verði síðasta árs og markaðurinn virðist gera ráð fyrir að danska fyrirtækið sé að missa fótfestu í ört vaxandi geira, samkvæmt danska viðskiptamiðlinum Børsen.
Samkvæmt Claus Johansen, framkvæmdastjóra sjóðsins Global Health Invest, hefur Eli Lilly náð forskoti.
„Novo hefur glatað forystunni. Ef horft er til nýrra ávísana á lyf eru þeir komnir á eftir Lilly, sem hefur slegið í gegn á ótrúlega skömmum tíma,“ segir Johansen, sem fjárfestir í báðum fyrirtækjunum.
Novo sækir um markaðsleyfi
Novo Nordisk hefur þó ekki setið auðum höndum. Samkvæmt upplýsingum sem birtust í greininni Biopharmadive yfir páskana hefur fyrirtækið sótt um markaðsleyfi fyrir töflu-útgáfu af þyngdartapalyfinu Wegovy. Johansen bendir á að Novo gæti jafnvel verið á undan Lilly með lyfið á markað.
Á sama tíma hefur Eli Lilly aukið bjartsýni fjárfesta með yfirlýsingu um að fyrirtækið geti hafið dreifingu orforglípróns á alþjóðlegum vettvangi án takmarkana á framboði – atriði sem reynst hefur mörgum lyfjaframleiðendum þröskuldur á undanförnum misserum.
„Þetta vekur von meðal fjárfesta. Framleiðslugeta og afhendingargeta eru lykilatriði í þessari samkeppni. Nú telja margir að Lilly hafi tekist að leysa þau vandamál,“ segir Johansen.
Miklar væntingar um framhaldið
Morten Gregersen, yfirfjárfestir hjá Formuepleje, bendir á að fjárfestar bíði nú spenntir eftir fyrsta ársfjórðungsuppgjöri Novo þann 7. maí. Þar vænta þeir ítarlegrar umfjöllunar um pillustefnu fyrirtækisins og framleiðslugetu þess.
„Við reiknum með að fá nánari upplýsingar um nýja hágildispillu af Wegovy, sem Novo hyggst setja á markað seint 2025 eða snemma 2026. Spurningin er hversu miklu magni þeir treysta sér til að framleiða – og hvernig þeir hyggjast sannfæra fjárfesta,“ segir Gregersen.
Hann telur þó að markaðurinn hafi brugðist of harkalega við og ofmetið áhrif samkeppninnar:
„Vörulínan hjá Eli Lilly er sterk, en það þýðir ekki endilega að hún sé marktækt betri en sú hjá Novo. Það eru fleiri aðilar að stíga inn á markaðinn og líklegra er að tveggja hesta keppni haldi áfram frekar en að Novo hverfi úr myndinni.“
Viðkvæm staða
Þrátt fyrir að hlutabréf Novo hafi lækkað um 25% á aðeins einum mánuði bíður Johansen frekari upplýsinga áður en hann ákveður hvort hann kaupi fleiri bréf eða selji.
Hann telur líklegt að Novo gefi út væga afkomuspá í neikvæða átt, einkum vegna hægari vaxtar í Bandaríkjunum og áframhaldandi áskorana vegna samheitalyfja.
Í febrúar tóku bandarísk heilbrigðisyfirvöld lyfin Ozempic og Wegovy af lista yfir lyf í skorti, sem þýðir að eftirhermuframleiðendum er ekki lengur heimilt að nýta sér undantekningar sem áður giltu. Þrátt fyrir það hefur ekki orðið sú aukning í ávísunum sem margir höfðu vænst.
„Fjárfestar voru að vonast eftir hraðari viðsnúningi sem aldrei kom. Ef Novo tekst að ná aftur tökum á ávísunum og loka bilið gagnvart eftirhermum, þá gæti traust markaðarins styrkst á ný,“ segir Johansen.
