Fjármála- og efnahagsráðuneytið hafnar því að eigendur íbúðabréfa hafi verið snuðaðir við afhendingu ríkisbréfa og reiðufjár við uppgjör ríkisins á ÍL-sjóði.
Eigendur HFF-skuldabréfa ÍL-sjóðs samþykktu í byrjun apríl tillögur ríkisins um uppgjör á bréfunum í samræmi við tillögur sem viðræðunefnd fjármálaráðherra og ráðgjafar 18 lífeyrissjóða mótuðu.
Líkt og Viðskiptablaðiðgreindi frá í gærkvöldi sagði Óttar Guðjónsson, fyrrum eigandi HFF-bréfa, að bréfin hafi ekki verið afhent á sömu ávöxtunarkröfu og eigendum hafði verið lofað.
Ráðuneytið svaraði þeirri gagnrýni í morgun og segir að mismunur á nafnverði HFF-bréfanna og því sem kröfuhafar fengu í hendur stafi eingöngu af verðbreytingum á eignum sjóðsins á því tímabili sem leið frá virðismati þann 7. mars 2025 og þar til greiðslur fóru fram 12. júní.
Uppgjörið fór fram í samræmi við skilmála sem samþykktir voru af skuldabréfaeigendum í apríl, þar sem kveðið var á um að miða skyldi við virðismat eignasafns sjóðsins þann 7. mars 2025. Það mat tók m.a. mið af markaðsgengi ríkisskuldabréfa og reiðufé í sjóðnum.
Kröfuhafar fengu síðan hlutfallslega úthlutun í reiðufé og ríkisskuldabréfum, miðað við þessa stöðu eignasafnsins.
Engin sérstök skerðing fór fram og uppgjörið var jafnt fyrir alla, að því er fram kemur í skýrslu ráðuneytisins.
Mismunurinn sem margir hafa kvartað undan felst í því að markaðsvirði sumra ríkisskuldabréfa hafði lækkað frá mars til júní.
Þá lækkaði einnig gengi evrunnar gagnvart krónu, sem hafði áhrif á verðgildi evrueigna. Meðal annars:
HFF34-bréf: Verðmæti uppgjörseigna lækkaði úr 174,4 ma.kr. í 167,3 ma.kr. á tímabilinu.
Þegar tekið er tillit til greiðslna á tímabilinu reyndist raunvirði afhentra eigna 178,3 ma.kr.
HFF44-bréf: Verðmæti eigna hækkaði örlítið, úr 476,9 ma.kr. í 484 ma.kr.
Þetta gerðist m.a. vegna hækkunar ávöxtunarkröfu margra undirliggjandi eigna og lækkunar evrunnar.
Ráðuneytið segir því að „allir kröfuhafar hafi borið jafna áhættu af virðisbreytingum á tímabilinu“ – og að þessi nálgun hafi tryggt jafnræði milli lítilla og stórra eigenda.
Útgreiðslur misjafnar eftir vörsluaðilum
Í skýrslu ráðuneytisins kemur einnig fram að mögulegur munur á raunútkvittunum til skuldabréfaeigenda megi rekja til þess hvernig mismunandi vörsluaðilar (t.d. bankar) útfærðu úthlutunina.
Aðalatriðið sé þó að allir fengu jafnt hlutfall af þeim eignum sem voru til staðar í mars.
Þó að fjárhagslegt virði hafi breyst þá hafnar ráðuneytið því að kerfisbundin skerðing eða hagræðing á kostnað skuldabréfaeigenda hafi átt sér stað.
