Samstæða Rapyd Europe hf. hagnaðist um 3.070 milljónir króna eftir skatta árið 2024 samanborið við 830 milljóna hagnað árið áður.
Rekstrartekjur fjártæknifélagsins jukust um 40,7% milli ára, eða um 10,5 milljarða, og námu 36 milljörðum króna. Rekstrarhagnaður fyrir afskriftir (EBITDA) meira en tvöfaldaðist milli ára og nam 4,3 milljörðum króna.
Viðskiptalíkan Rapyd felst í að veita fjármála- og fjártæknifyrirtækjum innviðaþjónustu, sem þau síðan byggja sínar sérhæfðu lausnir ofan á. Í skýrslu stjórnar í ársreikningi Rapyd segir að 2024 haf verið metár hjá fjártæknifélaginu og er þar vísað í aukinn EBITDA-hagnað samhliða tekjuvexti félagsins.
Ársverk í fyrra voru 201 samanborið við 229 árið áður sem félagið rekur til samlegðar sem náðist fram í rekstrinum. Laun og tengd gjöld námu 4,2 milljörðum í fyrra samanborið við 4,8 milljarða árið 2023.
Eignir Rapyd Europe voru bókfærðar á 52,2 milljarða króna í árslok 2024, samanborið við 57,5 milljarða árið áður. Eigið fé var um 11,7 milljarðar og eiginfjárhlutfall í árslok 22,4%.
Lykiltölur / Rapyd Europe hf.
| 2023 |
| 25.670 |
| 1.928 |
| 830 |
| 57.457 |
| 9.935 |
| 229 |
Rapyd keypti Korta árið 2020 og Valitor af Arion banka á 14,6 milljarða króna árið 2022. Rapyd Europe og Valitor sameinuðust formlega í ársbyrjun 2023.
Í lok ágúst síðastliðnum gerðu Rapyd Europe og Síminn Pay samkomulag um að síðarnefnda félagið myndi taka yfir kortalán og greiðsludreifingar VISA og MasterCard korthafa sem sett voru á laggirnar og starfrækt af hálfu Valitor. Í lok febrúar tók Síminn Pay við kortalánum um níu þúsund einstaklinga fyrir 1.500 milljónir króna.
