Í útboði ríkisins á hlutabréfum í Íslandsbanka fengu fagfjárfestar úthlutað bréfum fyrir samtals 3,7 milljarða króna í svokallaðri tilboðsbók B.

Alls fengu 56 aðilar úthlutun þar, að hluta til með tilboðum sem voru margfalt hærri en almenningi stóð til boða í tilboðsbók A.

Allir þeir sem fengu úthlutað í tilboðsbók B buðu 117,5 krónur á hlut eða hærra í útboðsferlinu og voru þau því samþykkt á grundvelli úthlutunarreglna.

Fagfjárfestarnir greiddu þó á endanum 106,56 krónur á hlut líkt og almenningur.

Þó að lífeyrissjóðir, bankar og hlutabréfasjóðir hafi verið umsvifamestir í B-bókinni fengu mörg einkahlutafélög að kaupa fyrir meira en 20 milljónir, sem var hámarkið í tilboðsbók A.

Um er að ræða félög sem stunda fasteignaviðskipti, hótelrekstur, eru tengd sjávarútvegi eða stunda aðra fjármálastarfsemi.