Almennt hlutafjárútboð á hlut ríkisins í Íslandsbanka hefst í dag kl. 8:30 og gert er ráð fyrir að því ljúki fimmtudaginn 15. maí kl. 17. Þetta kemur fram í tilkynningu fjármálaráðuneytisins.
Grunnmagn útboðs nær til allt að 376.094.154 hluta í Íslandsbanka hf, eða 20% af heildarhlutafé bankans. Miðað við útboðsgengi í tilboðsbók A má ætla að söluandvirði ríkisins verður a.m.k. 40 milljarðar króna ef full áskrift fæst.
Þá hefur fjármálaráðherra heimild til að auka útboðsmagnið ef umframeftirspurn verður til staðar í útboðinu. Samanlagt geta grunnmagn útboðsins og möguleg magnaukning numið öllum eftirstandandi hlutum ríkisins í Íslandsbanka eða 45,2% af almennum hlutum bankans.
Útboðsgengi í bók A 106,56 kr.
Útboðsgengi fyrir tilboðsbók A, þ.e. fyrir einstaklinga með íslenska kennitölu, er 106,56 krónur á hvern útboðshlut. Verðið byggir á meðalverði hlutabréfa í Íslandsbanka hf. síðustu 15 daga fyrir birtingu útboðslýsingar, með 5% fráviki, eins og kveðið er á um í lögum um ráðstöfun eignarhlutar ríkisins í Íslandsbanka hf.
Áskriftir í tilboðsbókar A verða ekki skertar niður fyrir 2 milljónir króna „nema það reynist nauðsynlegt til að mæta eftirspurn og skal það þá gert hlutfallslega”.
Útboðsgengi fyrir tilboðsbók B, sem er opin bæði einstaklingum og lögaðilum, verður ákvarðað með tilboðsfyrirkomulagi. Útboðsgengi vegna tilboðsbókar B skal taka mið af hæsta tilboði sem nær grunnmagni, hins vegar má útboðsgengi tilboðsbókar B aldrei vera lægra en fast verð í tilboðsbók A.
Einnig geta eftirlitsskyldir fagfjárfestar sem uppfylla skilyrði útboðsins gert tilboð fyrir eigin reikning í tilboðsbók C. Útboðsgengi fyrir tilboðsbók C verður í íslenskum krónum og ákvarðað með hliðsjón af útboðsgengi fyrir tilboðsbók B. Fjárfestum sem gera tilboð í tilboðsbók C verður gefinn kostur á að hækka tilboð sitt til samræmis við útboðsgengi fyrir tilboðsbók B skömmu eftir að útboðsgengi fyrir tilboðsbók B er tilkynnt þann 15. maí.
Birta lista yfir kaupendur að útboðinu loknu
Gert er ráð fyrir að niðurstöður úthlutunar í útboðinu verði tilkynntar fjárfestum þann 16. maí 2025 fyrir opnun markaða
Að útboðinu loknu mun fjármálasráðuneytið birta lista yfir kaupendur, bæði einstaklinga og lögaðila.
Barclays Bank Ireland PLC, Citigroup Global Markets Europe AG og Kvika banki hf. eru sameiginlegir alþjóðlegir umsjónaraðilar og sameiginlegir söluaðilar í útboðinu.
Lesendur geta nálgast útboðslýsinguna hér. Hægt er að leggja inn tilboð hér.
