Ríkissjóður hefur gengið frá sölu á gamla Skólabæ að Suðurgötu 26 í Reykjavík á 435 milljónir króna staðgreitt. Framkvæmdasýslan - Ríkiseignir (FSRE) auglýsti eignina til sölu í byrjun febrúar á 465 milljónir. Kaupverðið er því 30 milljónum króna undir ásettu verði.
Kaupendur eru Jón Aðalbjörn Jónsson og Runólfur Vigfús Jóhannsson. Þeir eiga aðra fasteign neðar í götunni, að Suðurgötu 14.
Jón Aðalbjörn og Runólfur Vigfús eru eigendur samlagsfélaganna Esko og Burðs, sem hafa verið með starfsemi á sviði heilbrigðisþjónustu. Auk þess eiga þeir fasteignafélagið Gula húsið ehf.
Þegar eignin var auglýst kom fram að gamli Skólabær, sem er friðað bárujárnsklætt timburhús þarfnist allsherjar endurnýjunar en aðeins ytra byrði sé friðað. Húsið hafi þó fengið gott viðhald og líti vel út að utan og innan. Farið var í viðhaldsframkvæmdir að utan árið 2021 og allsherjar framkvæmdir að innan og utan árin 2011/2012.
Suðurgata 26 ásamt bílskúr er skráð sem 406,7 fermetrar en af því er íbúðarrými 385,3 fermetrar og sérstæður bílskúr 21,4 fermetrar. Um er að ræða steinsteypt einbýlishús byggt árið 1928 á rúmgóðri eignarlóð með grónum garði og steyptri girðingu meðfram allri lóðinni.
Gamli Skólabær var eitt af fyrstu húsunum sem voru reist til að hýsa almenna skólastarfsemi í borginni. Í upphafi var húsið nýtt fyrir skólaskrifstofur Reykjavíkurborgar og síðar Menntamálaráðuneytið en breytt í einbýlishús árið 2006.
Húsið var hannað af Guðjóni Samúelssyni og Hjálmari Sveinssyni. Það var um tíma nýtt af kanadíska sendiráðinu fyrir sendiherra.
