Íslenska ríkið hefur verið dæmt til að greiða Vinnslustöðinni og Huginn tvo milljarða króna auk dráttarvaxta í bætur vegna úthlutunar aflaheimilda á makríl frá 2011 til 2018. Fyrirtækin tvö höfðu stefnt ríkinu í sitt hvoru lagi en Vinnslustöðin keypti svo Huginn árið 2021.
Ríkið mun greiða Huginn rúmlega 800 milljónir króna og Vinnslustöðinni 750 milljónir króna.
Upphaflega höfðu sjö fyrirtæki krafist rúmlega tíu milljarða króna af íslenska ríkinu vegna aflaheimildanna. Fimm fyrirtæki féllu svo frá málsókn sinni, þar á meðal Eskja, Gjögur, Ísfélag Vestmannaeyja, Loðnuvinnslan og Skinney-Þinganes.
Vinnslustöðin og Huginn héldu hins vegar áfram með kröfu sína og komst Héraðsdómur Reykjavíkur að þeirri niðurstöðu að íslenska ríkið bæri skaðabótaábyrgð þar sem fyrirtækin tvö hefðu verið úthlutað minni aflaheimildum á tímabilinu en skylt var samkvæmt lögum.
