Snorri Másson, þingmaður Miðflokksins og nefndarmaður í framtíðarnefnd Alþingis, segir að forvitnilegu frumvarpi hafi verið dreift á Alþingi í dag þar sem ríkisstjórnin hyggst festa hina „nútímalegu framtíðarnefnd“ í sessi.
„Hin yfirlýsta hagræðingarstjórn hefur gert hlé á hagræðingarstörfum og ákveðið að fara í hina áttina í einu mikilvægu máli. Þar er það sjálfur stjórnarmeirihlutinn sem nýtur góðs af og uppsker meiri launuð nefndarstörf. Nú á að festa í sessi hina nútímalegu „framtíðarnefnd“ út kjörtímabilið, í stað þess að leyfa henni að renna sitt skeið á enda um áramót líkt og til stóð að óbreyttu,“ skrifar Snorri.
Ferðalög, fjör og launahækkanir
Um leið á að veita formanni nefndarinnar sérstaka tíu prósenta launaviðbót, sem hefur ekki verið, en kemur nú í hlut nefndarformanns Jóns Gnarr sem er jafnframt þingmaður Viðreisnar.
Framtíðarnefndin var stofnuð árið 2018 og hefur m.a. unnið að sviðsmyndagreiningum um þróun samfélagsins til lengri tíma, m.a. með áherslum á loftslagsmál, lýðræði og mannréttindi.
Þrátt fyrir metnaðarfullar umfjallanir og ráðstefnur hefur gagnsemi hennar þó verið dregin í efa af fulltrúum úr fleiri en einum stjórnmálaflokki.
„Frá því að nefndin, sem hefur verið lýst sem gjöf Vinstri grænna til Pírata, hóf störf árið 2018 hefur margt verið brallað.
Ófáar málstofurnar hafi verið haldnar með ófáum hagaðilum um allt frá lýðræði og mannréttindum og til loftslagsmála. Farið í nokkrar skemmtilegar ferðir,“ skrifar Snorri.
Snorri segir að þingmenn úr öllum flokkum séu sammála um að gagn nefndarinnar hafi því miður verið lítið sem ekkert.
„Þar með er ekki gert lítið úr góðum pælingum góðs fólks, eins og til dæmis þeirri sviðsmyndagreiningu í síðustu framtíðarnefndarskýrslu að ef Íslendingar næðu að gerast „kyndilberar í loftslagsmálum“ myndi íbúasamsetning landsins mögulega þróast í þá átt að hér myndi ríkja fjölmenning þar sem við myndum njóta „fjölgunar innflytjenda sem aðhyllast grænar lausnir.“ Óneitanlega er það ein sviðsmynd.“
Snorri segir að ekkert af þessu breyti þó þeirri staðreynd að starf nefndarinnar hafi verið í hæsta máta ómarkvisst frá upphafi.
„Kröftum okkar alþingismanna og enn fremur fjármunum skattgreiðenda er betur varið í eitthvað annað miklu gagnlegra en framtíðarnefnd. Þessari tilraun ætti að ljúka hér (P.S. Þessi afstaða okkar Miðflokksmanna er alfarið reist á málefnalegum grunni og tengist ekki á nokkurn hátt vonbrigðum okkar með að nefndarmenn hafi hafnað tillögu okkar á fyrsta fundi um að breyta nefndinni í fortíðarnefnd)“ skrifar Snorri.
