Argentína náði mikilvægum áfanga á alþjóðlegum fjármálamörkuðum í síðustu viku þegar landið aflaði sér 1 milljarðs dala frá erlendum fjárfestum með útboði á skuldabréfum sem eru gefin út í argentínskum pesóum en seld í dollurum.
Þetta er í fyrsta sinn í sjö ár sem Argentína sækir fjármagn með þessum hætti á alþjóðlegum mörkuðum, eftir að aðgangur landsins lokaðist í kjölfar skuldauppgjörs árið 2020.
Um er að ræða ríkisskuldabréf gefin út í argentínskum pesóum samkvæmt argentínskum lögum, en þau voru seld fyrir dollara.
Bréfin bera 29,5 prósenta fasta vexti og eru á gjalddaga árið 2030. Þó að þau séu seld fyrir erlendan gjaldmiðil greiða þau aðeins út í pesóum og eru því nýtt af stjórnvöldum til að styrkja gjaldeyrisforða án þess að kaupa dollara beint á markaði.
„Frábærar fréttir,“ skrifaði Luis Caputo fjármálaráðherra á samfélagsmiðlum eftir að ljóst varð að eftirspurn hefði farið fram úr 1 milljarðs hámarki sem stjórnvöld höfðu sett. „Að geta endurfjármagnað afborganir er lykilatriði!“
Samkvæmt Financial Times er útboðið skýrt merki um að traust fjárfesta á stefnu Javier Milei forseta sé að aukast.
Hann hefur frá kjöri sínu í lok árs 2023 gripið til umfangsmikilla aðhaldsaðgerða, fellt niður gjaldeyrishöft og samið við Alþjóðagjaldeyrissjóðinn um 20 milljarða dala aðstoðarpakka í apríl.
„Stjórnvöld hafa sýnt að þau geta dregið úr halla og aukið fyrirsjáanleika í hagkerfinu. Það eykur bæði traust fjárfesta og trú stjórnvalda á eigin getu til að fjármagna sig,“ segir William Jackson, yfirhagfræðingur hjá Capital Economics.
Skuldabréfin eru með tveggja ára innlausnarákvæði sem veitir fjárfestum möguleika á að losa sig við bréfin áður en forsetakosningar fara fram árið 2027.
Það eykur öryggi fjárfesta þar sem margt í stefnu Milei hefur hingað til verið framkvæmt með forsetatilskipunum sem auðvelt væri að afturkalla af nýrri stjórn.
Þrátt fyrir að skuldabréfin séu seld fyrir dollara greiða þau eingöngu í pesóum. Það skýrir hin háa vaxtakjör, enda felst í því veruleg gjaldmiðilsáhætta.
„Við vitum ekki hvaða gjaldmiðlakerfi verður við lýði eftir fimm ár,“ segir Christine Reed, sérfræðingur hjá Ninety One-sjóðastýringarfélaginu. „Skiptin sem Milei hefur gert eru framkvæmd með tilskipunum og því óvíst hversu varanlegar þær eru.“
Milei hefur lýst því yfir að hann vilji ekki safna gjaldeyrisforða með því að prenta pesóa til að kaupa dollara, aðferð sem áður hefur ýtt undir verðbólgu.
Með því að selja skuldabréf sem fjárfestar greiða með dollurum en ríkið greiðir til baka í pesóum tekst honum þó í reynd að ná sama árangri án þess að brjóta gegn eigin stefnu.
„Þetta er óbein leið til að bæta við gjaldeyri og svar við helstu spurningu fjárfesta um hvernig ríkið ætlar að byggja upp forðann,“ segir Salvador Vitelli, sérfræðingur hjá Romano Group í Buenos Aires.
Þrátt fyrir þetta útboð er Argentína enn langt frá markmiðum sem sett eru í nýju samkomulagi við Alþjóðagjaldeyrissjóðinn.
Þar er gert ráð fyrir að landið bæti við 4,4 milljörðum dala í gjaldeyrisforða fyrir 13. júní. Hingað til hefur það aðeins náð að bæta við brotabroti af þeirri upphæð.
Stjórnvöld eru í viðræðum við alþjóðlega banka um 2 milljarða dala skuldaviðskipti með endurleigu (repo-samning), sem ættu að hjálpa við að ná þessu markmiði.
Á sama tíma hefur argentínski seðlabankinn gripið til inngripa á gjaldeyrismarkaði, 409 milljónir dala voru notaðar í apríl til að halda genginu stöðugu, þrátt fyrir að slíkt brjóti í bága við samkomulagið við AGS sem heimilar aðeins inngrip í óstöðugt markaðsumhverfi.
Skuldabréfaútboðið markar mikilvægt skref fyrir argentínska hagkerfið og stefnu Milei, en framtíðargengi þess veltur á því hvort ríkisstjórnin nái að halda áfram að styrkja forðann, koma á stöðugleika og byggja traust meðal fjárfesta.
