Rósa Guðbjartsdóttir, bæjarstjóri Hafnarfjarðar, hefur ákveðið að gefa kost á sér á framboðslista Sjálfstæðisflokksins í Suðvesturkjördæmi fyrir komandi Alþingiskosningar.
Rósa tók sæti í bæjarstjórn Hafnarfjarðar árið 2006 og var áður formaður bæjarráðs. Hún hefur síðan verið bæjarstjóri síðustu ár en Valdimar Víðisson, oddviti Framsóknarflokks, tekur við stöðunni þann 1. janúar 2025.
„Ég hef ákveðið að gefa kost á mér í 3. sæti framboðslista Sjálfstæðisflokksins í Suðvesturkjördæmi fyrir komandi Alþingiskosningar.
Eftir að hafa leitt Sjálfstæðisflokkinn í Hafnarfirði í rúm 10 ár og átt þannig þátt í því að koma flokknum í meirihluta í bæjarstjórn eftir langt hlé, vil ég leggja mitt af mörkum til að tryggja Sjálfstæðisflokknum glæsilegan árangur í komandi kosningum,“ skrifar Rósa.
„Ég tel að mín reynsla sem bæjarfulltrúi í 18 ár, formaður bæjarráðs og bæjarstjóri í rúm 6 ár, muni nýtast vel í landsmálunum. Mín störf sýna að ég hef fylgt grundvallarhugsjónum sjálfstæðisstefnunnar af einurð sem birtist meðal annars í ábyrgri fjármálastjórn, frelsi til athafna, skattalækkunum, skilningi á því að velferð sé ekki tryggð nema með öflugu atvinnulífi og virðingu fyrir skattfé almennings.“
Rósa er stjórnmálafræðingur frá Háskóla Íslands og starfaði um árabil við blaða- og fréttamennsku, lengst af sem fréttamaður á fréttastofu Stöðvar 2 og Bylgjunnar. Rósa hefur einnig verið ötull rithöfundur og ritstjóri hjá Bókafélaginu.
Á árunum 2007–2009 var Rósa varaþingmaður Sjálfstæðisflokksins og sat í nokkra mánuði á Alþingi. Hún hefur tekið virkan þátt í störfum innan íþróttahreyfingarinnar og er í fagráði Velferðarsjóðs barna.
Rósa er uppalin í Norðurbænum í Hafnarfirði og er stúdent frá Flensborgarskólanum. Hún er gift Jónasi Sigurgeirssyni og eiga þau fjögur börn.