Á fundi stjórnar Orkubús Vestfjarða þann 26 mars var tekin formleg ákvörðun um að sótt verði um virkjunarleyfi fyrir Kvíslatunguvirkjun í Steingrímsfirði svo hægt sé að ráðast í virkjunina. Um er að ræða stærsta einstaka verkefni sem Orkubú Vestfjarða hefur ráðist í frá upphafi.
Áætlaður kostnaður við byggingu virkjunarinnar er ríflega 7 milljarðar króna. Stefnt er að því að hefja undirbúningsframkvæmdir í sumar, en aðal framkvæmdirnar verði á árinu 2026 og 2027. Áætlanir gera ráð fyrir að virkjunin verði farin að framleiða raforku í árslok 2027.
Virkjunin hefur þegar farið í gegnum umhverfismat, en beðið er eftir endanlegri staðfestingu aðalskipulags Strandabyggðar.
„Virkjunin fellur vel að þeim markmiðum stjórnar Orkubús Vestfjarða að tryggja næga orkuöflun félagsins innan Vestfjarða, auka afhendingaröryggi raforku á Vestfjörðum og gera félaginu kleift að taka þátt í grænum orkuskiptum á Vestfjörðum í samræmi við stefnu stjórnvalda,“ segir í tilkynningu Orkubús Vestfjarða.
Félagið segir Kvíslatunguvirkjun hafa alla burði til að verða arðbært verkefni fyrir Orkubúið. Virkjunin myndi auk þess hafa afgerandi áhrif á afhendingaröryggi rafmagns á Ströndum, á Reykhólum og í Inndjúpi, en reiknað er með að það aukist um allt að 90%.
„Virkjunin mun því draga mikið úr kostnaði við framleiðslu orku með díselvélum og minnka um leið losun gróðurhúsalofttegunda vegna keyrslu varaafls á því svæði.“
Áformað afl virkjunarinnar er 9,5 MW í byrjun og má gera ráð fyrir að hún framleiði um 60 GWst að meðaltali á ári, en mögulegt er að bæta við lítilli 0,4MW virkjun í þrepi á milli uppistöðulóna virkjunarinnar.
Félagið segir Kvíslatunguvirkjunina fylgja fast á hæla Mjólkárvirkjunar að stærð, en hún sé stærsta virkjun Orkubúsins og samanstendur í raun af þremur virkjunum, Mjólká I, Mjólká II og Mjólká III, sem samtals eru 11,2 MW.
