Fasteignakaup Jeff Bezos, stofnanda Amazon, gætu endað fyrir dómstólum eftir að ósáttur seljandi hefur ákveðið að stefna fasteignasalanum í viðskiptunum.
Bezos keypti í fyrra fasteign á 1,1 hektara lóð við sjávarsíðuna á eyjunni Indian Creek í Miami-borg á 68 milljónir Bandaríkjadali.
Nokkrum mánuðum síðar keypti hann 19 þúsund fermetra fasteign við hlið hússins á 79 milljónir dala en hann bætti þriðju eigninni við á eyjunni fyrir 90 milljónir dala.
Seljandi fasteignarinnar sem Bezos keypti í fyrra hefur ákveðið að stefna fasteignasölunni Douglas Elliman, sem sá um að gæta hagsmuna bæði seljanda og kaupanda í viðskiptunum.
Samkvæmt stefnunni segir seljandinn að fasteignasalinn hafi beitt blekkingum til að komast hjá því að segja að Bezos væri kaupandinn og hann hafi tapað 6 milljónum dala í viðskiptunum.
Seljandinn, Leo Kryss, meðstofnandi leikfanga- og raftækjafyrirtækisins Tectoy, keypti eignina árið 2014 á 28 milljónir dala.
Verðmat eignarinnar var 85 milljónir dala í maí í fyrra, skömmu áður kaupin fóru í gegn.
Sem fyrr segir keypti Bezos nærliggjandi eign á 68 milljónir dala skömmu áður og sannfærði fasteignasalinn Kryss um að 79 milljónir dala væri því ágætis verð fyrir eignina.
Að sögn Kryss hringdi Jay Parker, forstjóri Douglas Elliman í Flórída, í sig persónulega og sagði honum að Bezos væri ekki kaupandinn að eigninni.
Hann komst síðan að því í fjölmiðlum að Bezos hafi verið kaupandinn að báðum eignum og vill meina að fasteignasalinn sem átti að gæta hagsmuna hans í viðskiptunum hafi þannig skafað um 6 milljónir dala af virði eignarinnar, Bezos í hag.
Kryss fullyrðir að hann hefði aldrei veitt 7,1% afslátt af virði eignarinnar hefði hann vitað að einn ríkasti maður heims væri að sækjast eftir henni.
