Eyþór Kristleifsson, forstjóri Skræðu heilbrigðislausna, hugbúnaðarfyrirtækis á sviði heilbrigðistækni, segir Ölmu Möller landlækni og heilbrigðisráðherraefni Samfylkingarinnar hafa sýnt sitt rétta andlit í viðtali í Reykjavík síðdegis í vikunni.
„Í viðtali í Reykjavík síðdegis lýsti Alma Möller landlæknir, frambjóðandi Samfylkingarinnar, forsendum meðferðar opinbers fjármagns á vegum embættisins. Þar ríktu alræðistilburðir opinberrar forsjárhyggju eins og glögglega kom fram í framsetningu hennar. Þegar meðferð embættisins á skattpeningum undangenginna ára er skoðuð er ljóst að tilgangurinn helgar meðalið. Hér afhjúpast hið sanna andlit Ölmu og Samfylkingarinnar,“ skrifar Eyþór í aðsendri grein á Vísi.
Hann segir Ölmu sýna „algjört skilningsleysi á forsendum nýsköpunar” en grundvallarforsenda nýsköpunar er tilvist frjálsra markaða þar sem unnt er að bjóða fram vörur og þjónustu í samkeppni við aðra með sem fæstum aðgangshindrunum.
„Á þessum forsendum hafa vestræn hagkerfi byggt í 200 ár sem og velferð einstaklinganna sem í þeim búa. Það er ekki tilviljun að engin okkar eru með farsíma, tölvur eða nýtum vefmiðla eða streymisþjónustur frá Norður-Kóreu, Venesúela eða Kúbu. Þess í stað hefur nýsköpun þrifist í löndum á borð við Bandaríkin, Finnland og Suður-Kóreu,” skrifar Eyþór.
Eyþór segir forsendur nýsköpunar vera að réttur jarðvegur sé til staðar. Bestu lausnir sem finnast í dag hafa orðið til í opnum hagkerfum frjálsra markaða þar sem samkeppni þrífst og aðilar fá að spreyta sig á því að koma nýjum hugmyndum á framfæri og láta reyna á ágæti þeirra.
„Það sem Alma kallar „að hafa gert það besta úr hlutunum“ snýr ekki bara að fjármununum, heldur hefur teymi landlæknis stundað ríkisrekna hugbúnaðarþróun og miðstýringu á innleiðingum lausna fyrir íslenskt heilbrigðiskerfi árum saman, ekki bara hið opinbera, heldur einnig á einkamarkaði. Þannig er Ölmu fyrirmunað að skilja að aðilar sem ekki hafa tekið þátt í nýtilkomnum útboðum embættisins kunni að starfa og hafa hagsmuni á öðrum mörkuðum en hinum opinbera,“ skrifar Eyþór.
Hann segir Ölmu telja það ekkert óeðlilegt að hið fjármagnaða sjúkraskrárkerfi hins opinbera sé boðið til sölu á einkamarkaði í samkeppni við lausnir nýsköpunar.
„Það er því ekki að undra að það veki óhug undirritaðs ef Alma taki við heilbrigðisráðuneytinu þar sem miðstýringarstefnan og alræðishyggja í heilbrigðismálum á uppruna sinn hjá sjálfréttlættum embættismönnum og afvegaleiddum ráðherrum,“ skrifar Eyþór.
„Líkt og flokksfélagi Ölmu þá hefur hún staðið fyrir kaupum á hugbúnaðarlausnum í ígildi stafrænna stráa. Í viðtalinu nefndi Alma ekki einu orði vildarvin sinn Origo/Helix sem hún heldur áfram að greiða hundruð milljóna án fyrirliggjandi samninga. Þær greiðslur eru á hennar ábyrgð, hvað sem líður gömlum samningum. Þá þakkar Alma sér að útboð séu hafin á vegum embættisins, þegar hið rétta er að það var fyrir kærur hagsmunaaðila, þ.m.t. til ESA og fyrir úrskurði Kærunefndar útboðsmála að embættið var neytt til að endurskoða afstöðu sína. Þannig eru það blóðugur, margra ára slagur og málaferli hagsmunaaðila sem hafa leitt til ákveðinna breytinga í stjórnsýslunni þó svo að ekki sé hægt að merkja raunverulegar hugarfarsbreytingar skv. orðræðu Ölmu,“ skrifar Eyþór.
Hann segir að Alma hafi alveg gleymt því að nefna að útboð fjarfundalausnar var kært til Kærunefndar útboðsmála þar sem útboðið var sniðið að lausn sem embættið hafi búið að greiða fyrir og taka í notkun nokkrum árum áður í íslensku heilbrigðiskerfi.
„Að lokum, hvað sem Alma segir, þá segja gildandi samningar að Heklu kerfið sé í eigu Origo/Helix. Samfylkingin stefnir á ball í bragganum. Ljóst er að Degi og Þórði Snæ er ekki boðið og í huga undirritaðs er boðs Ölmu þegar útrunnið.“
