Allir nefndarmenn peningastefnunefndar Seðlabanka Íslands sammæltust um að halda stýrivöxtum óbreyttum í 9,25% á fundi nefndarinnar í ágústmánuði.
Mun það hafa verið í sjötta sinn í röð sem nefndin kemst að þeirri niðurstöðu en á fundi nefndarinnar í maímánuði greiddi Arnór Sighvatsson, settur varaseðlabankastjóri fjármálastöðugleika, atkvæði gegn tillögu seðlabankastjóra um að halda stýrivöxtum óbreyttum.
Í fundargerð nefndarinnar sem birtist eftir lokun markaða í dag segir að nefndin hafi metið það svo að undirliggjandi verðbólga hefði aukist á milli funda og væri enn mikil og að verðhækkanir væru á breiðum grunni þótt húsnæðisliðurinn vægi enn þungt.
„Allir nefndarmenn voru sammála um að halda vöxtum óbreyttum. Verðbólga væri áfram þrálát og verðbólguvæntingar hefðu lítið breyst. Þótt hægt hefði á umsvifum í þjóðarbúskapnum frá því í fyrra væri staðan að mörgu leyti svipuð og hún var á maífundinum. Nefndin taldi að innlend eftirspurn væri enn nokkuð sterk og fáar vísbendingar væru um að efnahagslífið hefði kólnað frá síðasta fundi nefndarinnar, hvort sem litið væri til vinnu- eða húsnæðismarkaðar. Þá virtust launahækkanir undanfarna mánuði og aðgerðir í ríkisfjármálum í tengslum við kjarasamninga hafa stutt við eftirspurn,” segir í fundargerð nefndarinnar.
Að mati nefndarinnar endurspegluðust launahækkanir einnig að hluta til í miklum vexti innlána heimila í takt við hækkun vaxta. Sparnaðarstig heimila væri enn tiltölulega hátt og jákvætt væri að sjá hversu vel miðlunin hefði gengið í gegnum þennan farveg undanfarin misseri þótt mikill sparnaður gæti hugsanlega ýtt undir eftirspurn horft fram á veginn.
„Þá væri einnig ljóst að uppkaup ríkisins á íbúðarhúsnæði í Grindavík hefðu haft hvetjandi áhrif á fasteignamarkaðinn en að mati nefndarinnar væru þau áhrif tímabundin. Hins vegar þótt litið væri fram hjá áhrifum vegna flutninga Grindvíkinga virtust umsvif á húsnæðismarkaði vera nokkuð sterk. Fram kom í umræðunni að í ljósi kröftugra efnahagsumsvifa og hversu þrálát verðbólga væri gæti verið þörf á því að hafa taumhald peningastefnunnar þétt til lengri tíma en ella enda tæki nokkurn tíma fyrir aðhald peningastefnunnar að hafa tilætluð áhrif,” segir í fundargerðinni.
Það ætti sérstaklega við þegar verðbólga hefði verið lengi yfir markmiði og kjölfesta verðbólguvæntinga við markmið hefði veikst
Peningastefnunefndin telur einnig vandasamt að hægja á eftirspurn í ljósi viðvarandi hækkana launa og aukinna tilfærslna frá hinu opinbera. Á fundi nefndarinnar var bent á að hugsanlega væri erfitt að ná verðbólgu niður í markmið innan ásættanlegs tíma nema hægja verulega á efnahagsumsvifum.
efndin taldi því að í ljósi þess að enn væru hvorki komnar fram nægjanlega skýrar vísbendingar um að verðbólguþrýstingur væri að minnka né að verðbólguvæntingar færu lækkandi þyrfti taumhald peningastefnunnar áfram að haldast þétt.
„Þótt vaxtahækkanir bankans hefðu skilað árangri í að draga úr spennu og stuðla að hjöðnun verðbólgu væri þróunin hægari en reiknað var með. Með hliðsjón af umræðunni lagði seðlabankastjóri til að vextir bankans yrðu óbreyttir. Meginvextir bankans, þ.e. vextir á sjö daga bundnum innlánum, yrðu 9,25%, innlánsvextir (vextir á viðskiptareikningum) 9%, vextir af lánum gegn veði til sjö daga 10% og daglánavextir 11%.”
Sem fyrr segir samþykktu allir nefndarmenn tillöguna en að mati peningastefnunefndarinnar er núverandi aðhaldsstig hæfilegt til þess að koma verðbólgu í markmið en þrálát verðbólga og kraftur í innlendri eftirspurn kallar á varkárni.
Engu að síður mun mótun peningastefnunnar sem fyrr ráðast af þróun efnahagsumsvifa, verðbólgu og verðbólguvæntinga, segir í fundargerðinni.
