Provision ehf., sem rekur gleraugnaverslanirnar Eyesland og er leiðandi í innflutningi á augnheilbrigðisvörum, og GG Optic ehf., sem rekur gleraugnaverslanirnar Augað og ProOptik, hafa sameinað rekstur sinn undir nafni Provision. Þetta kemur fram fréttatilkynningu frá fyrirtækjunum.
Með sameiningunni verður nafni gleraugnaverslunarinnar ProOptik í Kringlunni og Spönginni breytt í Eyesland og verða útsölustaðir Eyesland því fimm talsins, samkvæmt tilkynningu.
Augað í Kringlunni, sem er hluti af sameinuðu félagi, verður áfram rekið undir eigin vörumerki.
„Það hefur verið langur en jafnframt spennandi aðdragandi að sameiningu félaganna og verkefnið áhugavert þar sem við sameiningu verður til öflugt félag á markaði með áherslu á frekari vöxt og þjónustuframboð á íslenskum gleraugna- og augnheilbrigðismarkaði,“ segir Hilmar Ingimundarson, stjórnarformaður Provision ehf.
„Sameinað félag stendur á traustum grunni og getur veitt viðskiptavinum sínum breitt vöruframboð og framúrskarandi þjónustu.“
Á síðasta ári opnaði Eyesland gleraugnaverslun á Keflavíkurflugvelli.
Provision ehf. rekur gleraugnaverslanir Eyesland í Kringlunni, Glæsibæ, Granda, Keflavíkurflugvelli og Spönginni innan tíðar auk Augans í Kringlunni.
