Nýverið hóf Monerium samstarf við Metamask, stærsta bálkakeðjuveski heims með yfir hundrað milljónir notenda, sem felur í sér að Matamask gefur út Mastercard kort með rafeyri Monerium. Þannig geta eigendur rafrænna evra og punda sem eru útgefin af Monerium nýtt innistæður sínar í gegnum greiðslumiðlun Mastercard. Kortið er hægt að nota hvar sem er innan alþjóðlegs greiðslunets Mastercard.

„Bandaríska fyrirtækið ConsenSys er útgefandi Metamask og kortsins. Það er leiðandi aðili í bálkakeðjuvistkerfinu. Stofnandi þess, Joe Lubin, er einn stofnenda Ethereum bálkakeðjunnar, næstvinsælustu bálkakeðju heims á eftir Bitcon og þeirri fremstu sem styður við sýndarvélar. ConsenSys er einnig meðal fjárfesta í Monerium,“ segir Gísli Kristjánsson, framkvæmdastjóri Monerium, sem telur blasa við að samstarfið muni styðja við aukna veltu viðskipta með rafeyri Monerium.

Dalur, pund og króna

Auk útgáfu á rafrænum evrum gefur Monerium út rafræn pund (GBPe) í samstarfi við Gnosis Pay, sem er fyrsta viðurkennda stöðugleikamynt í sterlingspundi. Þá er ráðgert að opna útgáfu á rafrænum dal (USDe) síðar á þessu ári.

„Stöðugleikamyntir eru nær eingöngu gefnar út í Bandaríkjadal. Rafræn evra Monerium er fyrsta viðurkennda stöðugleikamyntin í evru. Á síðasta ári var velta með rafrænar evrur Monerium meira en helming allrar veltu evru á bálkakeðjum. Fyrstu fimm mánuði þess árs var veltan 2 milljarðar evra og hefur meira en tvöfaldast á ársgrundvelli,“ segir Gísli.

Monerium hafi einnig gefið út rafræna íslenska krónu (ISKe) í prófunarskyni. „Monerum var fyrst fyrirtækja til að fá viðurkennt leyfi til útgáfu stöðugleikamynta og fyrstu prófanir áttu sér stað með rafræna krónu. Má því til sanns vegar færa að íslenska krónan hafi verið fyrsta myntin sem gefin út sem viðurkennd stöðugleikamynt,“ bætir hann við.

Stöðugleikamyntir í Evrópu séu gefnar út samkvæmt rafeyrislöggjöf og séu stafrænt ígildi reiðufjár, líkt og innstæður í bönkum. Áhersla Monerium sé fyrst og fremst á Evrópumarkað og þá gjaldmiðla sem þar eru notaðir, svo sem evru, pund og dal. Fyrirtækið sjái þó einnig tækifæri til að þjónusta íslensk fyrirtæki og almenning, til dæmis í gjaldeyrisskiptum.

Nánar er fjallað um málið í Viðskiptablaðinu sem kom út í morgun. Áskrifendur geta lesið fréttina í heild hér.