Ivan Svan Corvasce, stofnandi Kokteilaskólans, RVK Cocktails og Vínskólans og eigandi Spritz Venue, ræðir í nýjasta hlaðvarpsþætti Íslenska Draumsins um fyrirtækin sem hann hefur byggt upp í kringum kokteilamenningu á Íslandi.
Ivan hefur með elju og ástríðu breytt því hvernig fræðsla, þjónusta og upplifun tengd kokteilum er háttað hér á landi. Hann er einnig höfundur bókarinnar Heimabarinn, sem gefur lesendum innsýn í kokteilagerð og veitir verkfærin til að búa til fyrsta flokks drykki heima fyrir.
Frá litlum giggum í uppselt fram í maí
Í viðtalinu fer Ivan yfir hvernig Kokteilaskólinn hófst sem lítið verkefni með örfáum viðburðum á tveggja mánaða fresti. Á örfáum árum hefur hann hins vegar vaxið í stóran viðburðarekstur þar sem bókanir eru fullar allt fram í maí.
Í dag halda þau viðburði fyrir allt frá 20 manns upp í 1.500 manna hópa, en það sem hefur verið lykillinn að velgengninni er að leggja allt upp úr þjónustulund og tryggja að gestir hafi skemmtilega og fræðandi upplifun.
Ivan leggur mikla áherslu á það í starfi sínu að þjónustan sé á heimsmælikvarða og að hver einasti gestur fái eftirminnilega upplifun. Hann talar um að þeir sem koma í Kokteilaskólann eiga að ganga út með bæði þekkingu og bros á vör – hvort sem það er á litlum einkaviðburði eða stórri árshátíð.
Mikilvægt að tryggja gæði og góða samninga
Ivan ræðir einnig um ferlið við að skrifa bókina Heimabarinn og hvað það krafðist mikillar heimildavinnu og nákvæmni. Hann segir að skrif bókarinnar hafi verið krefjandi en skemmtilegt verkefni og að það hafi komið honum á óvart hversu mikill undirbúningur fylgir því að gefa út vandaða bók.
„Það er ótrúleg heimildarvinna sem þarf að eiga sér stað til þess að gera bók,“ segir hann og nefnir að eitt af því mikilvægasta sem hann lærði var að tryggja góða samninga og tryggja að gæði séu alltaf í fyrirrúmi.
Treystu á eigin fjármögnun
Í dag er rekstur Ivans orðinn fjölbreyttur og samanstendur af mörgum þáttum sem allir snúa að veitingamenningu og drykkjargerð. Spritz Venue er nú orðin heimili Kokteilaskólans og Vínskólans, og þar sameinast mismunandi rekstrareiningar hans á einum stað.
Ivan og Ásthildur konan hans hafa saman byggt upp reksturinn frá grunni, aðeins með eigið fé. Hann segir frá því hlæjandi í þættinum þegar þau ætluðu fyrst að taka lán við opnun á stað og hringdu í bankann.
„Samtalið byrjaði vel, en þegar bankinn sá að kennitalan var aðeins ársgömul, þá var það búið spil.“
Þau ákváðu því að treysta á eigin fjármögnun og byggja fyrirtækið upp skref fyrir skref, sem hefur reynst vel.
Hvað er framundan?
Ivan segir að þó að mikið hafi verið áorkað, sé verkefnið rétt að byrja. Hann hefur enn ástríðu fyrir að bæta kokteilamenningu á Íslandi, fræða fólk og skapa skemmtilega viðburði sem fólk mun muna eftir.
Í þættinum gefur hann innsýn í sitt frumkvöðlahugarfar og hvernig hann sér framtíðina fyrir sér – með áframhaldandi vexti, nýjum hugmyndum og metnaði til að gera kokteilaupplifun Íslendinga enn betri.
