Þróunarbanki Evrópu samþykkti í morgun 150 milljóna evra lánsumsókn íslenska ríkisins vegna eldsumbrota á Reykjanesskaga, sem samsvarar um 22,5 milljörðum íslenskra króna á gengi dagsins.
Árlegur fundur Þróunarbankans fór fram á Hilton Reykjavík Nordica í morgun. Um er að ræða fimmtugasta og sjöunda fund bankans en Ísland hefur hýst fundinn þrívegis frá stofnun 1956.
Þróunarbankinn samþykkti í heildina að veita lán fyrir 1,1 milljarði evra en bankinn lánar fé á hagstæðum vöxtum til að fjármagna félagsleg verkefni.
Í fundargerð bankans um umsókn Íslandsd segir að tilgangur lánsins sé að aðstoða ríkið við að veita Grindvíkingum nauðsynlega aðstoð.
Segir þar einnig að um 70% af láninu verði greitt út við undirritun til að hraða aðstoð stjórnvalda.
Reykjavíkurborg fékk einnig lán frá þróunarbankanum fyrir viðhald á grunnskólum fyrir sambærilega upphæð eða 100 milljónir evra.
