Óttar Guðjónsson, fyrrum eigandi HFF-bréfa, segir farir sínar ekki sléttar eftir að uppgjör ríkisins við eigendur bréfanna fór fram í síðustu viku.
Eigendur HFF-skuldabréfa ÍL-sjóðs samþykktu í byrjun apríl tillögur ríkisins um uppgjör á bréfunum í samræmi við tillögur sem viðræðunefnd fjármálaráðherra og ráðgjafar 18 lífeyrissjóða mótuðu.
Um 81,4% eigenda HFF-34 bréfa samþykktu tilboð ríkisins og um 81,6% eigenda HFF-44 bréfa samþykktu tilboðið.
Í tillögunum fólst að kröfur samkvæmt HFF-bréfum, sem metnar eru á 651 milljarð króna, verði efndar með því að ÍL-sjóður og íslenska ríkið afhendi til uppgjörs ný ríkisskuldabréf að andvirði 540 milljarða króna, önnur verðbréf í eigu ÍL-sjóðs að andvirði 38 milljarða, og 73 milljarða króna í reiðufé, þar af evrur að andvirði 55 milljarðar króna.
Afhending ríkisskuldabréfanna fór fram í síðustu viku og segir Óttar að bréfin hafi ekki verið afhent á sömu ávöxtunarkröfu og eigendum hafi verið lofað.
„Það er lágmark að maður fái til baka það sem um var samið,“ segir Óttar.
Óttar bendir á að tilboð ríkisins hljóðaði upp á að HFF34-bréfin, líkt og Óttar átti, yrðu tekin af honum á ávöxtunarkröfunni 3,5687% en reyndin var sú að bréfin voru tekin af honum á kröfunni 3,773%.
„Síðan fæ ég afhent ríkisskuldabréf á móti, RIKS34, á ávöxtunarkröfunni 2,478% kröfu en ekki 2,8575% eins og tilboðið hljómaði upp á,“ segir Óttar.
Óttari reiknast til að þetta sé um 1% af nafnverði bréfanna.
Þar að auki hafi hann ekki fengið rétt greitt í reiðufé en líkt og fyrr segir fá fjárfestar 75% í ríkisbréfum og 25% í reiðufé.
„Ég er fá of lítið af bréfum og of lítið í reiðufé af því þeir eru að reikna vitlaust á hvaða kjörum átti að afhenda bréfin. Þannig þeir eru að borga rangt verð fyrir bréfin. Þetta er bara þjófnaður,“ segir Óttar.
Hann segist hafa verið í sambandi við aðra eigendur sem segjast vera í sambærilegri stöðu.
„Þó að 1% af nafnverði sé kannski mikið miðað við það sem ég átti þá er 1% af heildaruppgjörinu nokkrir milljarðar,“ segir Óttar. „Það er eðlilegt að fólk vilji fá það sem var lofað ekki bara 99% af peningunum,“ bætir Óttar við.
Óttar hefur bent fjármálaráðuneytinu á reiknivilluna og krafist leiðréttingar en honum hafa engin svör borist.
Óttar hefur verið gangrýnin á uppgjörið en hann benti meðal annars á að það í vor að uppgjörið fæli í sér í sér lakari kjör fyrir minni eigendur.
Minni eigendur hærra hlutfall greitt í reiðufé og ríkisskuldabréf með lægri ávöxtun og lengri binditíma en stærri eigendur.
Samkvæmt útreikningum hans nam „vaxtatapið“ fyrir minni eigendur allt að 5% yfir líftíma bréfanna.
