Fasteignafélagið Kaldalón hefur auglýst til sölu fasteignir í Vestmannaeyjum sem félagið eignaðist í desember.
Fasteignirnar voru hluti af greiðslu á kaupverði Skuggasteins ehf. á helmingshlut Kaldalóns í Steinsteypunni ehf í desember. Skuggasteinn ehf., að mestu í eigu Kristján Gunnars Ríkharðssonar.
Umræddar fasteignir í Vestamannaeyjum eru Vestmannabraut 22, Búhamri 2, 6, 8 og 10, Básaskersbryggju 2 og Kirkjuveg 20. Eignirnar eru alls um 2.350 fermetrar og brunabótamat þeirra samtals 954 milljónir króna. Eignirnar hafa verið nýttar í útleigu til ferðamanna en Kaldalón telur þær utan við kjarnastarfsemi sína.
Fasteignasafn Kaldalóns er alls um 42 milljarða virði en stærstur hluti eignanna er atvinnuhúsnæði á höfuðborgarsvæðinu.
Greinin birtist í Viðskiptablaðinu sem kom út í morgun.
