Fjármálaráðuneytið hefur ákveðið að ganga til samninga við fjóra erlenda aðila til að sinna sölu hlutabréfa í fyrirhuguðu útboði með hlut ríkisins í Íslandsbanka.
Í tilkynningu á vef Stjórnarráðsins kemur fram að upplýst verði um þá innlendu aðila sem sinna munu hlutverki söluaðila í fyrirhuguðu útboði fljótlega. Ráðuneytið auglýsti eftir söluaðilum vegna fyrirhugaðs útboðs þann 30. apríl síðastliðinn og umsóknarfrestur rann út 2. maí.
„Mikill áhugi var á verkefninu, ekki síst meðal erlendra aðila,“ segir í tilkynningunni.
Hinir erlendu söluaðilar sem ráðuneytið samdi við eru Arctic Securities AS, JP Morgan SE, UBS Europe SE, og ABN AMRO Bank N.V. (í samstarfi við ODDO BHF SCA).
„Söluaðilarnir þurfa að gangast undir fyrirkomulag útboðsins og fá söluþóknun sem nemur 0,75% af verðmæti þeirra hluta sem viðkomandi söluaðili selur,“ segir í tilkynningunni.
Líkt og áður hefur verið tilkynnt samdi ráðuneytið við Barclays Bank Ireland PLC, Citigroup Global Markets Europe AG og Kviku banka hf. um að vera umsjónaraðilar útboðsins og söluaðilar, og annast skipulagningu og yfirumsjón útboðsins, ásamt utanumhaldi tilboðsbóka.
Alþingi samþykkti í gær breytingar á lögum um ráðstöfun eignarhlutar ríkisins í Íslandsbanka hf. Ráðuneytið segir að fyrirhugað sé að salan fari fram með markaðssettu útboði á fyrri helmingi ársins, þar sem einstaklingar hafa forgang.
