Jónína Guðmundsdóttir forstjóri Coripharma segir árið í ár marka tímamót hjá íslenska lyfjafyrirtækinu en félagið setti nýverið þrjú lyf sem fyrirtækið þróaði á markað og stefnir á að koma þremur lyfjum til viðbótar á markað fyrir árslok.
Coripharma sér mikil vaxtartækifæri á alþjóðlegum mörkuðum og með áframhaldandi lyfjaþróun stefnir félagið að því að setja árlega 4-5 ný samheitalyf á markað í samstarfi við alþjóðleg samheitalyfjafyrirtæki.
Að sögn Jónínu er fyrirtækið að horfa fram á að tekjuflæði verði jákvætt í kringum áramótin 2025-2026.
„Þess vegna erum við að horfa á árið 2025 sem spennandi ár eftir flottan ársreikning í ár. Við höfum svolítið þurft að sýna fram á það fyrst að við gætum framleitt, svo við að gætum þróað og svo núna síðast að við getum selt það. Nú erum við komin í viðskiptasamband við tíu af tólf stærstu samheitalyfjafyrirtækjum í Evrópu þannig okkur hefur gengið mjög vel,“ segir Jónína.
Jónína Guðmundsdóttir forstjóri Coripharma segir árið í ár marka tímamót hjá íslenska lyfjafyrirtækinu en félagið setti nýverið þrjú lyf sem fyrirtækið þróaði á markað og stefnir á að koma þremur lyfjum til viðbótar á markað fyrir árslok.
Coripharma sér mikil vaxtartækifæri á alþjóðlegum mörkuðum og með áframhaldandi lyfjaþróun stefnir félagið að því að setja árlega 4-5 ný samheitalyf á markað í samstarfi við alþjóðleg samheitalyfjafyrirtæki.
Að sögn Jónínu er fyrirtækið að horfa fram á að tekjuflæði verði jákvætt í kringum áramótin 2025-2026.
„Þess vegna erum við að horfa á árið 2025 sem spennandi ár eftir flottan ársreikning í ár. Við höfum svolítið þurft að sýna fram á það fyrst að við gætum framleitt, svo við að gætum þróað og svo núna síðast að við getum selt það. Nú erum við komin í viðskiptasamband við tíu af tólf stærstu samheitalyfjafyrirtækjum í Evrópu þannig okkur hefur gengið mjög vel,“ segir Jónína.
Að hennar sögn hefur gengið vel að sækja fram á erlendum mörkuðum þar sem lyfjafyrirtækin átta sig alveg á því hvaðan Coripharma kemur. „Við erum að kaupa allar eignir Actavis á Íslandi. Stjórnendahópurinn er að uppistöðu, þessi reyndi hópur sem keyrði áfram Actavis. Lyfjaheimurinn veit því allavega að við erum ekki nýgræðingar og þess vegna hefur gengið vel að markaðssetja og koma okkur í fyrstu samningana.“
Spurð um hvernig hún sjái fyrir sér tekjustreymið í ár segir Jónína fyrirtækið vera að stefna á að klára árið í um 28 milljónum evra sem er um 4,2 milljarðar króna á gengi dagsins.
Á rúmum tveimur árum hefur Coripharma sótt um 8 milljarða með auknu hlutafé en stærstu hluthafar félagsins eru CP Invest slhf., félag í eigu Iðunnar framtakssjóðs og lífeyrissjóða, Eignarhaldsfélagið Hof, Snæból, og BKP Invest ehf.
Útboðsgengið í nýloknu hlutafjárútboði var 13,7 krónur og tóku flestir stóru hluthafar félagsins þátt.
„Núverandi hluthafarnir voru að koma mjög sterkir inn. Það má segja að nánast allir stærstu hluthafarnir hafi komið inn, nánast Pro Rata,“ segir Jónína.
CP Invest er stærsti hluthafi Coripharma en Iðunn framtakssjóður, sem er í vörslu Kviku banka, á helmingshlut í CP Invest, samkvæmt ársreikningi 2023. Frjálsi lífeyrissjóðurinn á síðan um 18% hlut, Almenni lífeyrissjóðurinn um 13% hlut og TM Tryggingar um 7%.
Eignarhaldið á CP Invest verður til með þeim hætti að Iðunn fjárfesti í Coripharma árið 2021 en eftir hlutafjáraukninguna 2022 var framtakssjóðurinn fullfjárfestur þar sem sjóðurinn má ekki eiga meira en 30% í einu félagi.
Lífeyrissjóðirnir sem eiga í Iðunni vildu hins vegar halda áfram að fjárfesta í Coripharma og því var félagið CP Invest stofnað.
„Þannig við þurfum alltaf að fá einhverja nýja hluthafa inn því Iðunn getur ekki stækkað meira við sig og eru hluthafar félagsins núna orðnir um 200 talsins,“ segir Jónína en þessi mikli fjöldi hluthafa skýrist meðal annars af því að starfsmönnum hefur verið boðið að fjárfesta í félaginu.
„Það er gaman þegar hagurinn fer saman,“ segir Jónína en um 200 starfsmenn starfa hjá fyrirtækinu um þessar mundir.
Coripharma sérhæfir sig í þróun, framleiðslu og útflutningi samheitalyfja ásamt því að sinna verktökuframleiðslu fyrir önnur lyfjafyrirtæki en fyrirtækið var árið 2018. Sama ár keypti félagið lyfjaverksmiðju og húsnæði Actavis í Hafnarfirði af lyfjarisanum Teva Pharmaceuticals fyrir ríflega 800 milljónir króna. Ári seinna keypti félagið þróunareiningu Actavis af Teva.
„Aðaltilgangur félagsins er þróun á samheitalyfjum sem við seljum svo í gegnum önnur lyfjafyrirtæki í Evrópu. Það tekur um fimm ár að þróa og setja á markað samheitalyf,“ segir Jónína.
„Við keyptum verksmiðjuna 2018 og þróunareininguna 2019 þannig það eru akkúrat fimm ár núna síðan við keyptum hana. Þannig við erum á skemmtilegum stað. Við höfum verið með tekjur, kannski ekkert rosalegan hagnað, en tekjur af verktakaframleiðslu. Við þurftum að koma vélinni af stað, þjálfa fólk og láta hjólin byrja að snúast,“ segir Jónína.
Breytingin í ár er þó sú að Coripharma er að setja á markað lyf sem voru þróuð af fyrirtækinu.
„Við erum núna komin með þrjú lyf á markað sem við þróuðum sjálf og erum að selja í gegnum önnur lyfjafyrirtæki í Evrópu og fyrir lok þessa árs ætlum við að setja önnur þrjú lyf á markað.“
„Við erum komin með pantanir fyrir þeim öllum. Þetta er algjört viðsnúningsár hjá okkur því það er miklu meiri framlegð af okkar eigin vörum. Okkar hluthafar hafa með þessum hlutafjáraukningum verið að fjárfesta gríðarlega í þessum þróunarverkefnum og nú er bara kominn uppskerutími,“ segir Jónína.
