Héraðsdómur í Glostrup hefur dæmt breska viðskiptamanninn Sanjay Shah í 12 ára fangelsi fyrir stórfelld fjár- og skattsvik í Danmörku.
Danska ríkið gerir jafnframt eigur að verðmæti 7,2 milljarða danskra króna, eða 140 milljarða íslenskra króna, upptækar. Samsvarar það um 80% af þeim 9 milljörðum danskra króna sem hann sveik af danska ríkinu.
Shah verður jafnframt meinað að stjórna fyrirtæki í Danmörku og mun danska ríkið vísa honum úr landi að fangelsisrefsingu lokið.
Samkvæmt Børsen mætti Shah í dómssal með jólasveinahúfu á hausnum og sýndi engin viðbrögð við dómsuppkvaðningu.
Um er að ræða lengsta fangelsisdóm í sögu Danmerkur fyrir efnahagsbrot.
Samkvæmt Børsen fékk dönsk-rússneska konan Irene Ellert þyngsta efnahagsbrotadóm í sögunni fyrr á árinu er hún var dæmd í níu ára fangelsi fyrir peningaþvætti.
Shah var dæmdur fyrir að vera höfuðpaurinn í fjársvikum fjármálafyrirtækisins Solo Capital en hann stofnaði félagið árið 2009.
Hægri hönd Shah, breski verðbréfamiðlarinn Mark Patterson, var dæmdur í átta ára fangelsi í mars á þessu ári fyrir þátttöku sína í svikunum.
Shah var dæmdur fyrir að hafa búið til gerviviðskipti með félög sem voru skráð í Bandaríkjunum og Malasíu en litu út fyrir að vera erlendir lífeyrissjóðir.
Solo Capital lét líta út eins og „lífeyrissjóðirnir“ væru að fjárfesta í Danmörku sótti um skattaafslætti sökum þess.
Solo Capital sá um öll viðskiptin og tók 80% þóknun fyrir.
Samkvæmt ákærunni tókst Shah að fá endurgreiddar 9 milljarða danskra króna, eða um um 183 milljörðum íslenskra króna, frá skattinum.
Viðskiptin áttu sér stað á árunum 2012 til 2015 eða þangað til skattayfirvöldum varð ljóst að þessir svokölluðu lífeyrissjóðir áttu aldrei neinar eignir eða hlutabréf í Danmörku líkt og fölsuð skjöl sögðu til um.
Shah var handtekinn í Dubaí að beiðni danskra stjórnvalda árið 2022 og framseldur til Danmerkur í desember í fyrra.
Shah sagðist saklaus af öllum ákærum og sagðist einungis hafa nýtt sér smugu í dönskum lögum um skattaendurgreiðslur.
