Sigurbjörn Eiríksson, framkvæmdastjóri Innviða Sýnar, keypti 45.460 hluti í fjölmiðla- og fjarskiptafélaginu í dag á genginu 22 krónur á hlut. Kaupverðið er því ríflega ein milljón króna.
Hlutabréfaverð Sýnar hefur lækkað um 7% í viðskiptum dagsins og stendur gengið í 21,6 krónum.
Félagið birti árshlutauppgjör eftir lokun markaða í gær sem sýndi tap upp á 357 milljónir í fyrra í samanburði við 2,1 milljarðs hagnað á árinu á undan.
Í uppgjörinu segir þó að framtíðarhorfur félagsins séu jákvæðar og mun Sýn leggja áherslu á innri vöxt á síðari hluta ársins 2025, sérstaklega með tilkomu enska boltans.
Rekstrarspá stjórnenda gerir ráð fyrir að hagnaður fyrir fjármagnsliði og skatta (EBIT) verði á bilinu 800-1.200 milljónir króna á árinu 2025.
Þessi spá tekur ekki tillit til mögulegrar lækkunar kostnaðar við rekstur fjarskiptainnviða í gegnum víðtækara samstarf á vettvangi Sendafélagsins.
Jafnframt er gert ráð fyrir að viðskiptavinum fjölgi umtalsvert á árinu, þar sem þeir kjósa að njóta betri þjónustu og samkeppnishæfra lausna í sjónvarpsáskriftum, farsímaþjónustu og heimatengingum.
„Ég hef fulla trú á að við náum að auka rekstrarhagnað af kjarnastarfsemi undanfarinna ára verulega. Við verðum þung í fjárfestingum á árinu vegna einskiptis kostnaðar við innleiðingu á nýrri stefnu, breyttri ásýnd félagsins og Enski boltinn er að koma heim. Stígandi verður í tekjum og arðsemi eftir því sem líður á árið og gert er ráð fyrir að síðari hluti ársins verði umtalsvert betri en sá fyrri. Enski boltinn, vinsælasta sjónvarpsefni landsins, er á leið aftur til okkar og leiknir verða 380 leikir á komandi leiktíð,” segir Herdís Dröfn Fjeldsted forstjóri Sýnar í uppgjöri.
