Sigurður Gísli Björnsson, fyrrverandi eigandi og framkvæmdastjóri Sæmarks-Sjávarafurða, neitaði sök fyrir héraðsdómi í dag í svokölluðu Sæmarks-skattamáli.
Mbl greinir frá málinu og segir að Sigurður hafi mætt til þingfestingar með Þorstein Einarsson lögmann.
Hann neitaði alfarið sök bæði fyrir hönd ákærða HK68 ehf. (áður Sæmark-Sjávarafurðir) og vegna sakarefna sem snúa að hans eigin persónu.
Fyrr í mánuðinum greindi Viðskiptablaðið frá því að Ólafur Þór Hauksson héraðssaksóknari hafi ákært þrjá í einu umfangsmesta skattsvikamáli Íslands. Málið hefur verið kennt við Sigurð og fyrirtæki hans.
Sigurður Gísli er ákærður fyrir að hafa staðið skil á efnislega röngum skattframtölum Sæmark á árunum 2010 til 2016. Samkvæmt embættinu voru rekstartekjur félagsins vanframtaldar vegna rangfærðra afslátta í tengslum við vörusölu tveggja fyrirtækja.
Í einu málinu nemur upphæðin tæpum 2,5 milljónum en upphæðin er mun hærri í máli hins eða tæpar 232 milljónir.
