Sjávarútvegsfélögin BRIM, Síldarvinnslan og Ísfélagið hafa orðið fyrir verulegri lækkun á markaðsvirði á árinu 2025. Samanlögð lækkun þeirra nemur rúmlega 67 milljörðum króna.
Sé tekið mið af gengi félaganna í kauphöllinni í byrjun árs, fjölda hluta og núverandi gengis, hefur markaðsvirði Brims farið úr 141,7 milljörðum í 116,4 milljarða króna. Markaðsvirði Síldarvinnslunnar hefur lækkað úr 168,2 milljörðum í 146,8 milljarða króna. Á sama tímibili hefur markaðsvirði Ísfélagsins farið úr 122,5 milljörðum í 101,5 milljarða króna.
Árið 2024 varð loðnubrestur sem hafði víðtæk áhrif á sjávarútveginn. Þá hefur yfirvofandi hækkun veiðigjalda einnig haft töluverð áhrif.
Samkvæmt greiningu Jakobsson Capital, um áhrif hækkunar veiðigjalda á verðmæti og arðsemi sjávarútvegsfélaganna þriggja í Kauphöllinni, er gert ráð fyrir enn meiri rýrnun á virði sjávarútvegsfélaganna.
Í greiningunni er varað við því að komi jafnframt til ytri áfalla, eins og meðal annars loðnubrests eða viðskiptastríðs, sé hætta á að sjávarútvegur verði „ekki lengur einn af máttarstólpunum í íslensku atvinnulífi.“
Verðmæti sjávarútvegsfélaganna þriggja í Kauphöllinni, sem eru að talsverðum hluta í eigu lífeyrissjóða, mun að sögn Jakobssen Capital rýrna um 53 milljarða króna.
Í nýbirtum ársreikningi Vinnslustöðvarinnar (VNV) tapaði félagið 3,5 milljónum evra, eða um hálfum milljarði króna, einkum vegna loðnubrests. Er þetta í annað skipti á síðustu 25 árum sem félagið er rekið með tapi.
Guðmundur Arnar Gunnarsson, stjórnarformaður VNV, sagði á aðalfundi útgerðarfélagsins í gær að verði boðaðar hækkanir ríkisstjórnarinnar á veiðigjöldum að veruleika muni Vinnslustöðin ekki geta fjárfest eins og gert hafi verið á undanförnum árum.
Með áframhaldandi óvissu í loðnuveiðum og hækkun veiðigjalda standa sjávarútvegsfélögin frammi fyrir krefjandi tímum. Aðgerðir stjórnvalda og aðlögun fyrirtækjanna að þeim áformum munu ráða miklu um hvernig greinin tekst á við þessar áskoranir.
„Tími er kominn til að endurnýja verulega skipakost félagsins og liggja fyrir teikningar af nýjum þriggja og fjögurra mílna bátum. Smíði 3ja mílna togbáta hafði verið boðin út og verðtilboð höfðu borist. Skipin voru hönnuð með sama hætti og Breki, með stórri og hæggengri skrúfu sem myndi minnka kolefnisspor útgerðar okkar til muna,“ sagði Guðmundur Örn.
„Stefnt var að því að semja um smíði skipanna á haustdögum, eða í kjölfar þess að við sæjum fram á loðnukvóta á næsta ári. Þessum áformum hefur nú verið slegið á frest vegna stefnu stjórnvalda um að liðlega tvöfalda veiðigjöld.”
