Skatturinn hótar slitum á 1.165 félögum

Ríkisskattstjóri hefur skorað á 1.165 félög að skrá raunverulega eigendur á næstu tveimur vikum. Áskorunin var birt í Lögbirtingablaðinu í dag. Áskorun ríkisskattstjóra er undanfari þess að honum verði veitt heimild til að krefjast skipta á aðilanum fyrir héraðsdómi, samkvæmt lögum um skráningu raunverulegra eigenda.

„Sinni ofangreindir aðilar ekki skráningarskyldu sinni með fullnægjandi hætti mun ríkisskattstjóri taka ákvörðun um að krefjast skipta á þeim og í kjölfarið krefjast dómsúrskurðar um slit eða skipti, sbr. 3. mgr. og 6. mgr. ákvæðis til bráðabirgða II við lög um skráningu raunverulegra eigenda, nr. 82/2019.“

Samkvæmt bráðabirgðaákvæðum laganna er óheimilt að ráðstafa eignum og réttindum skráningarskylds aðila eða stofna til skuldbindinga á hendur honum eftir birtingu tilkynningar í Lögbirtingablaði nema telja megi ráðstöfun nauðsynlega til að forða aðilanum eða kröfuhöfum hans frá verulegu tjóni enda veiti ríkisskattstjóri þá fyrirframheimild til ráðstöfunar hverju sinni.

Skatturinn tekur fram að áður en tveggja vikna frestinum lýkur getur fyrirsvarsmaður aðila óskað eftir því að fresturinn verði framlengdur allt að tveimur vikum og ber ríkisskattstjóra að verða við því ef hann telur lögmætar ástæður réttlæta frekari drátt á að skráningarskyldu sé sinnt.