Skatturinn krefst skipta á 870 félögum

Ríkisskattstjóri hefur tekið ákvörðun um að krefjast skipta á 870 félögum fyrir héraðsdómi en umrædd félög eru sögð ekki hafa sinnt skráningarskyldu sinni þegar kemur að raunverulegum eigendum. Þetta kemur fram í auglýsingu ríkisskattstjóra í Lögbirtingablaðinu.

Þann 11. janúar síðastliðinn skoraði hann á 1.165 félög að skrá raunverulega eigendur. Samkvæmt lögum um skráningu raunverulegra eigenda skal ríkisskattstjóri krefjast skipta á aðali sinni hann ekki skráningarskyldu innan fjögurra vikna frá birtingu áskorunar.

Svo virðist sem nærri 300 aðilar hafi brugðist við áskoruninni, miðað við fjölda félaga í fyrri tilkynningu Skattsins.

Ríkisskattstjóri segir að innlánsreikningum, greiðslureikningum og vörslureikningum, hverju nafni sem nefnast, í eigu eftirtalinna félaga verði nú læst að sinni kröfu. Þá sé þeim óheimilt að ráðstafa eignum og réttindum sínum eða stofna til skuldbindinga á sér nema telja megi ráðstöfun nauðsynlega til að forða þeim eða kröfuhöfum þeirra frá verulegu tjóni enda veiti ríkisskattstjóri þá fyrirframheimild til ráðstöfunar hverju sinni.