Skel fjárfestingafélag hefur undirritað kaupsamninga gagnvart innlendum stofnanafjárfestum um kaup þeirra á 153,9 milljónum hluta í Styrkási hf., eða því sem nemur ríflega 15,4% af útgefnu hlutafé félagsins. Kaupverð hlutanna er samtals er 3.150 milljónir króna en það samsvarar 20,47 krónum á hlut.
Söluverðið jafngildir bókfærðu virði eignarhlutar SKEL í Styrkás þann 31.12.2024. Kaupsamningarnir eru háðir hefðbundnum fyrirvörum sem gert er ráð fyrir að verði frágengnir í næstu viku. Þetta kemur fram í tilkynningu til Kauphallar.
Kaupendur að hlutunum í Styrkási eru VÍS tryggingar, Íslandssjóðir, Birta lífeyrissjóður, Íslenski lífeyrissjóðurinn og Lífeyrissjóður starfsmanna ríkisins (LSR). Samhliða kaupunum hefur Horn IV slhf., fagfjárfestasjóður í rekstri Landsbréfa, flutt hluti sína í Styrkás hf. milli sjóða, í SÁ Horn slhf. Fjárfesting og eignarhald LSR, Birtu og Íslenska lífeyrisjóðsins í Styrkás verður sömuleiðis í gegnum SÁ Horn.
Að loknum viðskiptunum eru hluthafar Styrkás 19 talsins. Stærsti hluthafi félagsins er Skel fjárfestingafélag með 47,9%, SÁ Horn með 39,2%, Máttarstólpi, eignarhaldsfélag Ásgeirs Þorlákssonar, með 8,7% og aðrir með 4,2%. Bókfært virði hlutafjár SKEL í Styrkási að viðskiptunum loknum nemur 9.819 milljónum króna.
Styrkás er þjónustufyrirtæki við atvinnulífið. Dótturfélög Styrkás starfa á sviði orku og efnavöru undir vörumerki Skeljungs, tækja og búnaðar undir vörumerki Kletts og eignaumsýslu undir vörumerki Stólpa.
Í tilkynningunni til Kauphallar segir að Skel hafi kynnt fyrirhugaða sölu hlutafjár í Styrkási fyrir fjárfestum í fjárfestakynningu í febrúar síðastliðnum. Í kynningu hafi komið fram að markmið Skeljar væri að fá horsteinsfjárfesta inn í hluthafahóp Styrkáss í aðdraganda skráningar félagsins og að Styrkás yrði ekki í meirihluta eigu Skeljar til lengri tíma, heldur í dreifðara eignarhaldi. Söluandvirðinu verði ráðstafað til niðurgreiðslu skulda og til að styrkja eiginfjárstöðu Skeljar.
„Innkoma fleiri stofnanafjárfesta í hóp hluthafa Styrkás er stór áfangi fyrir félagið en við höfum lagt mikið kapp á að breikka hluthafahópinn. Þeir aðilar sem nú mynda hluthafahóp Styrkáss eru meðal umsvifamestu fjárfesta hérlendis og okkur þykir afar ánægjulegt að fá þá með í að efla félagið og gera að leiðandi þjónustufyrirtæki á fyrirtækjamarkaði, með styrk til að þjónusta þá innviða- og atvinnuvegafjárfestingu sem er framundan á Íslandi,“ segir Ásgeir Helgi Reykfjörð, forstjóri Skeljar fjárfestingafélags, í tilkynningu til Kauphallar.
Ráðgjafar voru ACRO verðbréf og Beljandi lögmannsstofa.
