Skortstaða í hlutabréfum líftæknilyfjafyrirtækisins Alvotech jókst verulega í lok maí og nær tvöfölduðust skortseldir hlutir á aðeins tveimur vikum, samkvæmt nýjustu upplýsingum frá Nasdaq.
Um er að ræða talsverðan viðsnúning eftir að skortstaðan dróst saman á fyrri hluta maímánaðar, í kjölfar þess að félagið færði upp afkomuspá sína og hlutabéfaverð félagsins hækkaði.
Í byrjun maí stóð fjöldi skortseldra hluta í um 884 þúsund, en var kominn í rúmlega 1,55 milljón hluti þann 30. maí. Slíkt umfang hefur ekki mælst meira frá skráningu félagsins samkvæmt gögnum Nasdaq.
Miðað við skortstöðu upp á 1.547.698 hluti og markaðsgengi 10,18 dali á hlut, nemur heildarvirði skortstöðunnar í Alvotech um það bil 15,76 milljónum Bandaríkjadala. Samsvarar það um tæplega 2 milljörðum íslenskra króna.
Þessi aukna skortstaða ber með sér að hluti markaðarins hefur tekið að nýju veðmál um lækkandi gengi bréfa félagsins, þrátt fyrir að hlutabréfaverð Alvotech hafi hækkað í byrjun maímánaðar.
Í því samhengi hefur hlutfallið sem sýnir hversu marga daga það tæki að loka öllum skortstöðum á meðaltalsveltu (e. days to cover) hækkað úr 2,9 dögum í 6,4 daga og hefur aldrei verið hærra.
Slíkt getur skapað verulegan kaupþrýsting ef margir fjárfestar ákveða að loka stöðum sínum samtímis, þar sem þeir þurfa að kaupa hlutabréf til baka á markaði til að skila þeim til lánveitanda.
Viðsnúningur í afkomu Alvotech í uppgjöri í byrjun maí, sem var vel umfram væntingar markaðarins og nýjar tekjuáætlanir fyrir árið 2025, leiddu til mikillar hækkunar á gengi bréfa.
Fjárfestar sem höfðu áður veðjað gegn félaginu urðu í kjölfarið fyrir verulegu tapi og margir þeirra voru neyddir til að loka skortstöðum sínum, sem ýtti enn frekar undir hækkunina.
En þar sem skortstöðunum fjölgar nú á ný er ljóst að einhverjir fjárfestar telja að verðlagning félagsins sé komin of hátt miðað við undirliggjandi ávöxtunarmöguleika og eru því farnir að endurnýja neikvæða markaðsafstöðu sína.
Frjálst flot bréfa í Alvotech er takmarkað en aðeins um 36% af útgefnum hlutum eru í frjálsri umferð. Sökum þess getur jafnvel hóflegt umfang skortstöðu vegið þungt á markaði. Skortstaðan í Bandaríkjunum nemur nú um 3% af frjálsu floti vestanhafs.
Nýverið var þriðja skráning Alvotech formlega tekin til viðskipta í Stokkhólmi, með tilheyrandi hlutafjárútboði sem nam 10 milljörðum íslenskra króna.
Markaðsaðilar munu næst beina sjónum að uppgjöri annars ársfjórðungs, sem félagið hyggst birta í ágúst.
Uppgjörið gæti skorið úr um hvort nýlegar skorstöður reynist arðbærar eða hvort fjárfestar verði neyddir til að snúa aftur á kauphlið markaðarins.
