Skuldabréfaeigendur Warner Bros. Discovery hafa samþykkt umfangsmikla endurskipulagningu skulda sem leggur grunn að fyrirhuguðum klofningi fjölmiðlarisans í tvö aðskilin félög.

Með þessu nær David Zaslav forstjóri sjaldgæfum áfanga í viðleitni sinni til að styrkja fjárhagsstöðu félagsins, samkvæmt Financial Times.

Samkomulagið, sem var samþykkt fyrir helgi, felur í sér að fyrirtækið greiðir upp skuldabréf fyrir rúmlega 14 milljarða Bandaríkjadala.

Kaupin fara fram á litlum afslætti frá nafnverði í sumum tilvikum, en yfir markaðsverði.

Skuldastaða samstæðunnar mun lækka úr 36 milljörðum í um 34 milljarða dala.

Í skiptum fyrir þátttöku samþykktu skuldabréfaeigendur að aflétta ákveðnum takmörkunum (e. covenants), þar á meðal heimildum félagsins til frekari skuldaútgáfu, auk þess að falla frá rétti til tafarlausrar innlausnar verði eignir félagsins seldar í framtíðinni.

Endurskipulagningin er liður í stærri áætlun um klofningu Warner Bros. Discovery, þar sem streymis- og kvikmyndastarfsemi, eins og HBO og Warner Bros. Studios, verður aðskilin frá línulegu sjónvarpi, m.a. CNN og Turner Networks.

Gert er ráð fyrir að aðskilnaðurinn verði kláraður árið 2026 og með honum á að skapast rekstrarlegt svigrúm fyrir hvort félag um sig.

Til að fjármagna tilboðið til skuldbréfaeigenda fékk WBD bráðabirgðalán að fjárhæð 17 milljarða dala frá JPMorgan.

Það verður síðar fjármagnað með útgáfu langtímaskulda sem njóta hærri forgangs í greiðsluröð en núverandi skuldabréf félagsins.

Sú staðreynd veldur áhyggjum meðal sumra skuldabréfaeigenda, sérstaklega í ljósi þess að stór hluti skulda verður áfram tengdur hefðbundnum sjónvarpsrekstri sem stendur höllum fæti.

Warner Bros. Discovery hefur glímt við mikla skuldabyrði frá samruna Time Warner og Discovery árið 2022, þegar skuldir námu 55 milljörðum dala.

Þrátt fyrir að hafa lækkað skuldir um þriðjung hefur hlutabréfaverð félagsins hríðfallið – meira en 60% lækkun á þremur árum. Markaðsvirði WBD er nú um 25 milljarðar dala.

Fyrirtækið hefur einnig fengið lækkaða lánshæfiseinkunn hjá S&P, Moody’s og Fitch og skuldabréfin bera nú minna traust markaðarins en áður.

Hluti þeirra hefur langan líftíma – allt til 2050 – og sum eru keypt til baka á undir 80% af nafnverði.