Skúli kaupir í Play fyrir 10 milljónir

Skúli Skúlason, varaformaður stjórnar Play, keypti 0,7% hlut í flugfélaginu Play á föstudaginn síðasta fyrir 10 milljónir króna í gegnum eignarhaldsfélag sitt Fea ehf. Þetta kemur fram í tilkynningu til Kauphallarinnar.

Viðskiptablaðið greindi frá umræddum viðskiptum í lok síðustu viku en þau fóru fram á genginu 0,755 krónur á hlut. Hlutabréfaverð Play féll um 28,3% í síðustu viku og var 0,76 króna dagslokagengi félagsins á föstudaginn það lægsta í sögu félagsins.

Play birti ársuppgjör á mánudaginn í síðustu viku og síðar í vikunni tók gengið að lækka, sem gera má ráð fyrir að tengist umfjöllun um athugunarmerkingu Kauphallarinnar á Play í tengslum við ábendingar endurskoðanda í ársreikningi félagsins.

Play sendi frá sér tilkynningu á fimmtudaginn síðasta þar sem það sagðist harma óskýr­ar til­kynn­ing­ar og frétta­flutn­ing um rekstr­ar­hæfi fé­lags­ins.

Fea er næst stærsti einstaki hluthafi Play með 124,9 milljónir hluta, eða um 6,6%, sem er um 93,7 milljónir króna að markaðsvirði.

Þess má geta að Skúli keypti síðast hlutabréf í Play í lok október í kjölfar talsverðrar lækkunar á hlutabréfaverði flugfélagsins.