Hlutabréfaverð Haga hefur hækkað um tæplega 11% í vikunni en Hagar greindu frá því fyrir opnun markaða í gær að félagið hefði keypt allt hlutafé færeyska félagsins SMS, sem rekur m.a. átta Bónus lágvöruverðsverslanir.
Um 362 milljón króna velta hefur verið með bréf Haga í morgun og hefur gengið hækkað um 5% það sem af er degi.
Samanlögð velta eftir að kaupin voru tilkynnt er því orðin meiri en hálfur milljarður en um 220 milljón króna velta var með bréf Haga í gær.
Gengi félagsins stendur í 93 krónum þegar þetta er skrifað og hefur aldrei verið hærra en þegar það hóf vikuna í 84 krónum.
Hagar, móðurfélag Bónuss, Hagkaups og Olís, undirritaði í vikunni skilyrt samkomulag um kaup og sölu á öllu hlutafé í SMS við eigendur verslunarfélagsins P/F SMS í Færeyjum.
Kaupverð (e. enterprise value) í fyrirhuguðum viðskiptum er áætlað um 467 milljónir danskra króna eða um 9,4 milljarðar íslenskra króna. Kaupverðið er sagt byggja m.a. á rekstraráætlun ársins 2024 og fasteignasafni félagsins.
Fjármögnun viðskiptanna er tryggð, en gert er ráð fyrir að Hagar greiði um 50 milljónir danskra króna af kaupverðinu með hlutabréfum í Högum og yfirtaki jafnframt skuldir SMS sem er áætlað að verði 150-160 milljónir danskra króna við frágang viðskiptanna.
Heildartekjur SMS fyrir árið 2023 námu tæplega 700 milljónum danskra króna eða um 14 milljörðum íslenskra króna. Hagnaður félagsins fyrir fjármagnsliði og afskriftir (EBITDA) var um 56 milljónir danskra króna eða tæplega 1,1 milljarðar íslenskra króna.
