Hæstiréttur komst nýverið að þeirri niðurstöðu að endurskoðandinn Rögnvaldur Dofri Pétursson og BD30 ehf., áður endurskoðunar- og ráðgjafarfyrirtækið Ernst & Young ehf., þurfi að greiða þrotabúi Sameinaðs Sílikons rúmar 114 milljónir í skaðabætur auk auk skaðabóta- og dráttarvaxta, vegna sérfræðiskýrslu í tengslum við hlutafjárhækkun síðastnefnda félagsins í lok árs 2016.

Þrír aðrir dómar féllu sama dag sem lutu allir að aðkomu Rögnvaldar og Ernst & Young að málum Sameinaðs Sílkon en Rögnvaldur var sýknaður í tveimur þeirra og sýknaður „að svo stöddu“ í einu þeirra.

Hæstiréttur tók málin fyrir af þeim sökum að lagaleg óvissa ríkti um aðild þrotabús að skaðabótamálum vegna hlutafjáraukningar en einnig um ábyrgð endurskoðanda í tengslum við hlutafjáraukningar.

Hæstiréttur sló því föstu í öllum dómum að þrotabúið væri rétti aðilinn til að krefjast bóta ef það teljist tjón þrotabúsins að hlutafé sé ekki greitt með réttum hætti og að endurskoðandi bæri ábyrgð á að staðfesta hlutafjáraukningar. Rögnvaldur og E&Y voru þó bara talin hafa sýnt af sér saknæma háttsemi í einu tilviki.

Til eru margir dómar hérlendis sem staðfesta skaðabótaábyrgð endurskoðanda á öðrum atvikum líkt og ársreikningagerð en þessi dómur markar tímamót um að ábyrgð endurskoðanda nái nú til þess að staðfesta hlutafjárhækkanir.