Áfrýjunardómstóll í Bandaríkjunum hefur ákveðið að staðfesta lögmæti víðtækra tolla Donald Trump Bandaríkjaforseta tímabundið meðan á málaferli gegn þeim.
Málflutningur fyrir dómi fer fram þann 31. júlí en þangað til verða tollarnir áfram í gildi.
Úrskurðurinn felur í sér tímabundna frestun á dómi alríkisdómstóls í viðskiptamálum sem komst að þeirri niðurstöðu að Trump hefði farið út fyrir valdheimildir sínar við að leggja á tollana.
Trump hefur í seinni forsetatíð sinni sett á fjölda tolla sem hluta af því sem hann kallar „frelsisdagstolla“, meðal annars gegn Kína, Mexíkó og Kanada, og réttlætt það með vísan til neyðarlaganna International Emergency Economic Powers Act (IEEPA).
Forsetinn segir tollana nauðsynlega til að bregðast við þjóðaröryggisógn af völdum fíkniefnasmygls og viðskiptahalla.
Þessar ráðstafanir hafa fengið harða gagnrýni og þá hafa fimm lítil fyrirtæki stefnt forsetanum sem telja hann hafa farið langt út fyrir sínar lögbundnu heimildir. Dómur viðskiptadómstólsins í maí staðfesti þau sjónarmið og sagði að forsetinn gæti ekki, með vísan í IEEPA, sett á hvaða tolla sem honum hentaði, hvenær sem væri.
Niðurstaða áfrýjunardómstólsins í dag þýðir að fyrirtækin þurfa áfram að greiða tolla, þrátt fyrir að þeir kunni síðar að verða endurgreiddir.
Fulltrúar fyrirtækjanna segja það litlu skipta ef fyrirtækin verði þá þegar farin á hausinn.
„Hver er gagnsemi endurgreiðslu ef fyrirtækið sem greiddi tollana er orðið gjaldþrota?“ spurðu lögmenn þeirra í greinargerð til dómsins.
