Dagur Jóhannsson hefur tekið við rekstri Blómatorgsins við Birkimel, elstu blómabúðar landsins. Dagur hefur aldrei áður unnið í blómabúð en segist hafa alltaf haft mikinn áhuga á blómum.

Fasteignin fór á sölu í fyrra og segist Dagur hafa séð hversu mikið líf var þarna og hversu hamingjusamir allir sem gengu þaðan út voru, svo hann ákvað að stökkva á tækifærið.

„Ég hef oft verslað blóm og finnst þau alltaf gefa lífinu lit en ég hef aldrei unnið við þetta, þannig þetta verður pínu krefjandi. Maður verður svona starfsmaður í þjálfun hjá sjálfum sér fyrstu vikurnar en þetta kemur allt.“