Starfs­fólk Festi nýtti kauprétt á milljón hlutum

Starfs­menn Festi hf. og dóttur­félaga hafa nýtt kauprétt að sam­tals 1.048.552 hlutum í félaginu á genginu 187 krónur á hlut.

Heildar­and­virði kaupanna nemur 196,1 milljón króna, sam­kvæmt kaup­hallar­til­kynningu félagsins. Hluta­fé hækkar um eina milljón hluta

Nýtingin byggir á kaupréttaráætlun sem samþykkt var á aðal­fundi félagsins í mars í fyrra.

Gengið var aðlagað með til­liti til arð­greiðslna sem greiddar hafa verið frá því kaupréttar­samningarnir voru gerðir.

Markaðsvirði hlutanna um 312 milljónir

Hluta­fé félagsins hækkar því um 1.048.552 hluti og verður eftir hækkun 312.548.552 krónur að nafn­virði. Hver hlutur er að nafn­virði ein króna og veitir eitt at­kvæði á aðal­fundi.

Miðað við dagsloka­gengi hluta­bréfa Festi á föstu­dag, 298 krónur á hlut, nemur markaðsvirði nýút­gefnu hlutanna um 312 milljónum króna.

Virðis­aukningin fyrir viðkomandi starfs­menn er því um­tals­verð, þar sem hver hlutur var keyptur á 187 krónur eða 111 krónum undir markaðs­gengi.

Mis­munurinn á kaup­verði og markaðsvirði nemur þannig rúm­lega 116 milljónum króna, sem skýrir arð­semi kaupréttarins fyrir viðkomandi aðila.

Í samræmi við starfskjarastefnu Festi er í gildi kaupréttaráætlun sem samþykkt var á aðalfundi félagsins 6. mars 2024.

Áætlunin gildir í þrjú ár, til maí 2027, og nær til alls fastráðins starfsfólks Festi og félaga í sömu samstæðu. Markmið hennar er að tengja hagsmuni starfsfólks við afkomu félagsins og langtímamarkmið hluthafa. Um framkvæmd áætlunarinnar var tilkynnt 24. apríl og 5. maí 2024.

Samkvæmt grein 2.3 í kaupréttaráætluninni öðlast starfsfólk sem ráðist hefur til starfa eftir samþykkt áætlunarinnar rétt til að gera kaupréttarsamning.

Rétturinn tekur gildi frá næsta innlausnardegi eftir ráðningu og gildir þar til áætluninni lýkur eða starfslok verða. Sama gildir um starfsfólk nýrra félaga sem ganga í samstæðuna á gildistíma áætlunarinnar.

Í kjölfar nýtingar í maí og nýrra samninga ná gildandi kaupréttarsamningar til samtals 7.816.349 hluta, sem heimilt verður að nýta fram til maí 2027. Þar af eru:

• 6.389.589 hlutir með kaupgengi 187 kr.
• 1.426.760 hlutir með kaupgengi 297,1 kr.

Kaupgengi er leiðrétt fyrir framtíðargreiddum arði og samsvarandi úthlutunum til hluthafa. Samtals eru 1.350 starfsmenn Festi og dótturfélaga með gilda kaupréttarsamninga samkvæmt áætluninni.