Valfrjálst yfirtökutilboð John Bean Technologies Corporation til hluthafa Marel hf. í allt útgefið og útistandandi hlutafé í félaginu tekur gildi í dag.
Í greinargerð stjórnar Marels sem sent var til Kauphallarinnar í morgun segir að það sé samhljóða álit stjórnar að styðja tilboðið, þar með talið tilboðsverðið og aðra skilmála þess og mæla með því að hluthafar Marel samþykki tilboðið.
Að mati stjórnarinnar hefur fyrirhuguð sameining félaganna jákvæð áhrif er varðar hagsmuni Marel og starfsmanna félagsins.
„Ég er ákaflega stoltur af félaginu, þeim góða árangri sem náðst hefur með stefnu Marel og okkar mikilvæga hlutverki við að umbylta matvælavinnslu á heimsvísu. Stjórn Marel hefur að vel ígrunduðu máli lagt mat á það, með aðstoð óháðra ráðgjafa, hvaða þýðingu sameinað félag, JBT Marel Corporation, hefur fyrir hluthafa Marel og aðra hagaðila. Við höfum komist að þeirri niðurstöðu að góð rök séu fyrir sameiningu félaganna og tilboðið hafi í för með sér mikil sóknarfæri sem hafi jákvæð áhrif á hagsmuni Marel og hagaðila þess. Þar af leiðandi styður stjórn Marel einróma tilboð JBT í allt hlutafé félagsins og veitir jákvæða umsögn sína,” segir Arnar Þór Másson, stjórnarformaður Marel.
Í tilboðinu segir að þess sé vænst að rekstrarhagkvæmni muni skapa samlegðaráhrif í kostnaði sem nemur meira en 125 milljónum dala innan þriggja ára eftir lok viðskiptanna á mörgum sviðum, eins og hvað varðar aðfanga-, framleiðslu- og rekstrarkostnað.
Skuldir munu þó aukast en áætlað er að hið sameinaða félag verði með um 3,5x nettóskuldsetningarhlutfall við lok ársins 2024. Í tilboðinu er þó tekið fram að búist sé við því að nettóskuldsetning verði komin vel undir 3,0x við lok ársins 2025.
„Saman getum við þjónustað viðskiptavini enn betur með metnaðarfullum hópi starfsmanna beggja megin, auk þess að njóta góðs af aukinni stærðarhagkvæmni, breiðara vöruúrvali og víðfeðmu þjónustuneti. Sameinað félag, sem leiðtogi á heimsvísu í hátæknilausnum fyrir matvæla- og drykkjarvöruiðnaðinn, getur aukið sjálfbærni í okkar iðnaði og í hnotskurn haft enn jákvæðari áhrif á sjálfbærari vinnslu matvæla. Ég er sérstaklega ánægður með að ná öllu þessu fram og um leið byggja á einstakri arfleifð Marel.”
