Stjórn­endur keyptu bréf fyrir 109 milljónir

Fimm stjórn­endur og tengdir aðilar í tölvu­leikja­fyrir­tækinu Solid Clouds hf. tóku þátt í markaðsvið­skiptum með hluti í félaginu í dag og keyptu saman­lagt rúm­lega 72,7 milljónir hluta að and­virði 109,6 milljóna króna.

Um er að ræða við­skipti tengd 300 milljón króna hluta­fjáraukningu félagsins sem samþykkt var í síðustu viku.

Stærstu við­skiptin átti Eggert Árni Gísla­son, stjórnar­for­maður félagsins, sem keypti í gegnum félagið 1961 ehf alls 53.440.667 hluti á genginu 1,50 krónur á hlut.

Sam­tals nam það við­skipta­verð rúm­lega 80 milljónum króna, sem er það stærsta í þessari röð til­kynninga.

Fea ehf., í eigu Skúla Skúla­sonar stjórnar­manns, keypti 13.333.333 hluti, einnig á genginu 1,50 kr. Áætlað kaup­verð þessara bréfa er tæp­lega 20 milljónir króna.

Auk þeirra keyptu tveir lykil­stjórn­endur, Stefán Gunnars­son, for­stjóri félagsins, og Stefán Dór Björns­son, fjár­mála­stjóri, hvor um sig 2 milljónir hluta einnig á genginu 1,50 krónum. Sam­tals nema þessi við­skipti 6 milljónum króna.

Þá keypti Frigus ehf, félag sem Andrea Ól­sen stjórnar­maður er fram­kvæmda­stjóri yfir. Frigus keypti 2 milljónir hluta á sömu kjörum, að verðmæti 3 milljónir króna. Frigus er í eigu Lýðs Guð­munds­sonarþ

Við­skiptin fara fram í kjölfar ný­legs hluta­fjárút­boðs félagsins og virðast endur­spegla trú stjórn­enda á framtíð Solid Clouds.

Síðastliðinn föstu­dag var greint frá því að Solid Clouds hefði fengið undir­rituð áskriftar­lof­orð frá hæfum fjár­festum í nýtt hluta­fé að and­virði 300 milljónir króna.

Alls bárust áskriftir í 200.607.335 hluti á genginu 1,5 krónur á hlut. Félagið til­kynnti í lok apríl að það hefði ákveðið að lækka út­boðs­gengið í fjár­mögnunar­lotunni úr 2,25 krónum í 1,5 krónur á hlut.

Ofan­greind hluta­fjáraukning var háð samþykki hlut­hafa­fundar sem fór fram í dag.

Leikja­fyrir­tækið, sem er skráð á First North-markaðinn, lauk fyrr í ár út­gáfu breytan­legra skulda­bréfa að fjár­hæð 175 milljónir króna.

Skulda­bréfin eru á gjald­daga 15. septem­ber nk. og bera 15% fasta vexti og hafa breytirétt í hluti í félaginu miðað við gengið 1 króna fyrir hvern hlut nafn­verðs.