Þrjú stærstu endurskoðunar- og ráðgjafarfyrirtæki landsins, Deloitte, KPMG og Pricewaterhouse Coopers (PwC), veltu alls tæplega 18 milljörðum króna á síðasta rekstrarári. Til samanburðar námu heildartekjur fyrirtækjanna þriggja 15,2 milljörðum rekstrarárið á undan og nam tekjuaukningin því 18%. Þá nam hagnaður félaganna alls 2,1 milljarði króna á síðasta rekstrarári og jókst um 25% frá fyrra rekstrarári.
Í nýjasta tímariti Frjálsrar verslunar, 500 stærstu, sem kom út í síðustu viku, er meðal annars að finna greiningu á endurskoðunar- og bókhaldsgeiranum. Þar má sjá að heildarvelta tíu stærstu fyrirtækjanna í geiranum nam alls 21,9 milljörðum króna á síðasta rekstrarári. Til samanburðar nam heildarvelta rúmlega 18 milljörðum króna rekstrarárið á undan.
Umrædd þrjú stærstu fyrirtæki geirans stóðu því undir 91% af heildarveltu tíu stærstu fyrirtækja geirans. Þá stóðu fyrirtækin einnig undir 82% af heildarhagnaði tíu stærstu endurskoðunar- og bókhaldsfyrirtækja landsins.
Endurskoðun og ráðgjöf með hæsta hagnaðarhlutfallið
Samkvæmt fyrrnefndum lista 500 stærstu var Grant Thornton endurskoðun fjórða stærsta endurskoðunar- og bókhaldsfyrirtæki landsins á síðasta rekstrarári en félagið velti 647 milljónum og hagnaðist um 131 milljón. Þar af leiðandi var félagið með hagnaðarhlutfall upp á 20,3%. Tvö önnur félög voru með hærra hagnaðarhlutfall en það voru Regla, með 22% hagnaðarhlutfall, og Endurskoðun og ráðgjöf sem voru með hæsta hagnaðarhlutfallið, 25,3%.
Nánar er fjallað um málið í Viðskiptablaðinu. Áskrifendur geta nálgast fréttina í heild hér.
